ചെന്നൈ: തമിഴ്‌നാട്ടിൽ സർക്കാർ ഹോസ്റ്റലുകളിൽ താമസിക്കുന്ന വിദ്യാർഥികളുടെ പ്രതിമാസ ഭക്ഷണ അലവൻസ് വർധിപ്പിച്ചു. പിന്നാക്ക, ഏറ്റവും പിന്നാക്ക, ന്യൂനപക്ഷ ക്ഷേമ വകുപ്പുകൾക്കു കീഴിലുള്ള ഹോസ്റ്റലുകളിലെ വിദ്യാർഥികൾക്കാണ് ആനുകൂല്യം ലഭിക്കുക.
പുതുക്കിയ നിരക്കനുസരിച്ച് സ്കൂൾ വിദ്യാർഥികൾക്ക് പ്രതിമാസം 1,800 രൂപ ലഭിക്കും. നേരത്തേ ഇത് 1,400 രൂപയായിരുന്നു. കോളേജ് വിദ്യാർഥികളുടെ അലവൻസ് 1,500 രൂപയിൽനിന്ന് 2,000 രൂപയായും ഉയർത്തി. സ്കൂൾ വിദ്യാർഥികൾക്ക് 400 രൂപയുടെയും കോളേജ് വിദ്യാർഥികൾക്ക് 500 രൂപയുടെയും വർധനയാണ് വരുത്തിയത്.
സാമ്പത്തികമായി പിന്നാക്കം നിൽക്കുന്ന കുടുംബങ്ങളിൽനിന്നുള്ള വിദ്യാർഥികൾക്കായി വിദ്യാഭ്യാസ സ്ഥാപനങ്ങൾക്ക് സമീപം പ്രവർത്തിക്കുന്ന 1,363 ഹോസ്റ്റലുകളിലെ താമസക്കാർക്കാണ് ഇതിന്റെ പ്രയോജനം ലഭിക്കുക. സാമ്പത്തിക പ്രയാസങ്ങൾ കാരണം പഠനം മുടങ്ങാതിരിക്കാൻ ഹോസ്റ്റലുകളിൽ സൗജന്യ താമസവും ദിവസവും മൂന്ന് നേരം ഭക്ഷണവും നൽകുന്നുണ്ട്.
നിത്യോപയോഗ സാധനങ്ങൾ, പാചക എണ്ണ, പലവ്യഞ്ജനങ്ങൾ, പാൽ, ഇറച്ചി, മുട്ട, പച്ചക്കറികൾ, പാചകവാതകം എന്നിവയുടെ വില വർധിച്ച സാഹചര്യത്തിലാണ് ഭക്ഷണ അലവൻസ് ഉയർത്താൻ സർക്കാർ തീരുമാനിച്ചത്. പദ്ധതി നടപ്പാക്കുന്നതിനായി 19.51 കോടി രൂപ അധികമായി അനുവദിച്ചിട്ടുണ്ട്. അക്കാദമിക വർഷത്തിൽ പത്ത് മാസത്തേക്കാണ് അലവൻസ് നൽകുക.
നേരത്തേ അനുവദിച്ചിരുന്ന തുക വിദ്യാർഥികളുടെ പോഷകാഹാര ആവശ്യങ്ങൾ നിറവേറ്റാൻ പര്യാപ്തമല്ലെന്ന് ഹോസ്റ്റൽ വാർഡന്മാർ പരാതിപ്പെട്ടിരുന്നു. അലവൻസ് വർധിപ്പിച്ചതോടെ ഈ പ്രശ്നത്തിന് പരിഹാരമാകുമെന്നാണ് പ്രതീക്ഷ.
2017 ജൂണിൽ സ്കൂൾ വിദ്യാർഥികളുടെ അലവൻസ് 900 രൂപയായും കോളേജ് വിദ്യാർഥികളുടേത് 1,000 രൂപയായും ഉയർത്തിയിരുന്നു. പിന്നീട് 2023 ഒക്ടോബറിൽ മുഖ്യമന്ത്രി എം.കെ. സ്റ്റാലിൻ ഇത് യഥാക്രമം 1,400 രൂപയും 1,500 രൂപയുമായി വർധിപ്പിച്ചു. ഇതിന് പിന്നാലെയാണ് ഇപ്പോൾ വീണ്ടും അലവൻസ് ഉയർത്തിയിരിക്കുന്നത്.
