ന്യൂയോര്ക്ക്: മുന് യുഎസ് പ്രസിഡന്റ് ജോ ബൈഡന് (82) പ്രോസ്റ്റേറ്റ് കാന്സര് സ്ഥിരീകരിച്ചു. ഞായറാഴ്ച അദ്ദേഹത്തിന്റെ ഓഫിസ് പുറത്തിറക്കിയ പ്രസ്താവനയില് നിന്നാണ് രോഗവിവരം പുറം ലോകമറിയുന്നത്. കാന്സര് എല്ലുകളിലേക്കു വ്യാപിച്ചതായും പ്രസ്താവനയില് പറയുന്നു. മൂത്ര സംബന്ധമായ രോഗ ലക്ഷണങ്ങള് കണ്ടതിനെ തുടര്ന്ന് കഴിഞ്ഞ വെള്ളിയാഴ്ചയാണ് ജോ ബൈഡന് ഡോക്ടറുടെ സേവനം തേടിയത്. തുടര്ന്ന് പ്രോസ്റ്റേറ്റ് കാന്സര് സ്ഥിരീകരിക്കുകയായിരുന്നു. വളരെ വേഗത്തില് പടരുന്ന വിഭാഗത്തില്പ്പെട്ട കാന്സറാണ് ജോ ബൈഡന് സ്ഥിരീകരിച്ചിരിക്കുന്നത്. കാന്സര് രോഗം ഗുരുതരമാണെന്നാണ് പുറത്തു വരുന്ന റിപ്പോര്ട്ട്.
രോഗബാധ നിയന്ത്രണ വിധേയമാക്കാമെന്ന സൂചനയും ബൈഡന്റെ ഓഫീസ് നല്കുന്നുണ്ട്. യുഎസ് പ്രസിഡന്റ് പദവി വഹിച്ച ഏറ്റവും പ്രായമേറിയ വ്യക്തിയാണ് ജോ ബൈഡന്. അതേസമയം ജോ ബൈഡന്റെ രോഗനിര്ണയത്തില് യുഎസ് പ്രസിഡന്റ് ഡോണള്ഡ് ട്രംപ് ദുഖം രേഖപ്പെടുത്തി.
