പനാജി: ലോക സിനിമകളുടെ വൈവിധ്യമാർന്ന കാഴ്ചകളുമായി 57-ാമത് ഗോവ അന്താരാഷ്ട്ര ചലച്ചിത്രമേളയ്ക്ക് ഒരുങ്ങുന്നു. 2026 നവംബർ 20 മുതൽ 28 വരെ ഗോവയിലെ വിവിധ വേദികളിലായാണ് മേള നടക്കുന്നത്.
മേളയിലെ പ്രധാന ആകർഷണങ്ങളിലൊന്ന് ‘ബ്രിക്സ് രാജ്യങ്ങളിൽ നിന്നുള്ള സിനിമകൾ’ എന്ന പ്രത്യേക വിഭാഗമാണ്. ജനാധിപത്യം, സ്വാതന്ത്ര്യം, വ്യക്തിത്വം, ചരിത്രപോരാട്ടങ്ങൾ, ആഗോള വിഷയങ്ങൾ എന്നിവ പ്രമേയമാകുന്ന 21 സിനിമകളാണ് ഈ വിഭാഗത്തിൽ പ്രദർശിപ്പിക്കുന്നത്.
86 രാജ്യങ്ങളിൽ നിന്നുള്ള 150ലേറെ വിദേശ സിനിമകൾ മേളയിൽ പ്രദർശിപ്പിക്കും. വിവിധ രാജ്യങ്ങളുടെ സംസ്കാരവും ജീവിതരീതികളും സാമൂഹിക പ്രശ്നങ്ങളും അടുത്തറിയാനുള്ള അവസരമാണ് മേള ഒരുക്കുന്നത്.
ചരിത്രത്തിലെ പ്രധാന സംഭവങ്ങളും സാമൂഹിക മാറ്റങ്ങളും അവതരിപ്പിക്കുന്ന സിനിമകൾ ബ്രിക്സ് വിഭാഗത്തിന്റെ പ്രത്യേകതയാണ്. രൺബീർ കപൂർ നായകനായ നിതേഷ് തിവാരിയുടെ ‘രാമായണം’ ആണ് ഈ വിഭാഗത്തിലെ ഉദ്ഘാടന ചിത്രം.
1830കളിലെ ബ്രസീലിന്റെ പശ്ചാത്തലത്തിൽ ഒരുക്കിയ ‘അമാഡിയോ ആൻഡ് ദി ഹൈപ്പോതെറ്റിക്കൽ ന്യൂ വേൾഡ്’ എന്ന ചിത്രവും ശ്രദ്ധേയമാണ്. അടിമത്തത്തിനെതിരായ പോരാട്ടമാണ് സിനിമയുടെ പ്രമേയം.
1998ൽ ഇന്തോനേഷ്യയിൽ നടന്ന ജനകീയ പ്രക്ഷോഭത്തിനിടെ കാണാതായ വിദ്യാർഥിയുടെ കഥ പറയുന്ന ‘ദി സീ സ്പീക്സ് ഹിസ് നെയിം’ മറ്റൊരു പ്രധാന ചിത്രമാണ്. മകനെ തിരയുന്ന കുടുംബത്തിന്റെ വേദനയിലൂടെ രാജ്യത്തിന്റെ രാഷ്ട്രീയ ചരിത്രവും ചിത്രം അവതരിപ്പിക്കുന്നു. ദക്ഷിണാഫ്രിക്കൻ ചിത്രമായ ‘ദി ട്രെക്ക്’ കൊളോണിയൽ അധിനിവേശത്തിന്റെ ക്രൂരതയാണ് തുറന്നുകാട്ടുന്നത്.
കാലാവസ്ഥാ വ്യതിയാനം, സാമൂഹിക പ്രശ്നങ്ങൾ തുടങ്ങിയ വിഷയങ്ങളും ബ്രിക്സ് സിനിമാ വിഭാഗത്തിൽ ഇടംപിടിച്ചിട്ടുണ്ട്. മഴക്കാടുകളിലെ വെള്ളപ്പൊക്കവും കാലാവസ്ഥാ മാറ്റവും അച്ഛനും മകളും തമ്മിലുള്ള ബന്ധത്തിലൂടെ അവതരിപ്പിക്കുന്ന ഡോക്യുമെന്ററിയാണ് യുഗാണ്ട-ബ്രിട്ടൻ സംയുക്ത സംരംഭമായ ‘ഡ്രീമിങ് ഓഫ് സെറെനാഡ’. എത്യോപ്യയിലെയും അമേരിക്കയിലെയും സംയുക്ത സംരംഭമായ ‘ഫായാ ദായി’ ഖാറ്റ് കൃഷിയെ ആശ്രയിച്ച് ജീവിക്കുന്ന ഒരു സമൂഹത്തിന്റെ ജീവിതമാണ് ചിത്രീകരിക്കുന്നത്.
ഇറാഖിൽ നിന്നുള്ള അഭയാർഥി ബാലൻ കാണാതായ സുഹൃത്തിനെ തേടിയിറങ്ങുന്ന കഥയാണ് ഇറാനിയൻ ചിത്രമായ ‘പൗൾട്രി ഫാം’ പറയുന്നത്. സമകാലിക ലോകം നേരിടുന്ന മനുഷ്യാവകാശ പ്രശ്നങ്ങളും പ്രതിസന്ധികളും സിനിമയിലൂടെ അവതരിപ്പിക്കുന്നു. ലോകത്തിന്റെ വിവിധ ഭാഗങ്ങളിൽ നിന്നുള്ള സിനിമകളെ ഒരേ വേദിയിൽ എത്തിക്കുന്നതിലൂടെ ഇത്തവണത്തെ ഗോവ ചലച്ചിത്രമേള സിനിമാപ്രേമികൾക്ക് വേറിട്ട അനുഭവമാകുമെന്നാണ് പ്രതീക്ഷ.




