തിരുവനന്തപുരം: നയപ്രഖ്യാപന പ്രസംഗത്തിന് മുന്നോടിയായി വന്ദേമാതരം പൂർണമായി ആലപിക്കാത്തതിനെതിരെ പ്രതിഷേധവുമായി ബിജെപി നേതാവും എംഎൽഎയുമായ വി. മുരളീധരൻ.

ഗവർണർ പങ്കെടുക്കുന്ന ചടങ്ങുകളിൽ ദേശീയ ഗീതമായ വന്ദേമാതരം മുഴുവൻ ആലപിക്കണമെന്ന കേന്ദ്രസർക്കാർ നിർദേശം ഉണ്ടായിട്ടും നിയമസഭയിൽ അത് പാലിക്കപ്പെട്ടില്ലെന്ന് അദ്ദേഹം ആരോപിച്ചു. ഇത് ഗവർണറോടും രാജ്ഭവനോടും ഉള്ള അവഹേളനമാണെന്നും അദ്ദേഹം പറഞ്ഞു.

150-ാം വാർഷികം ആഘോഷിക്കുന്ന ദേശീയഗീതത്തെയും സർക്കാർ അപമാനിച്ചതായി അദ്ദേഹം വിമർശിച്ചു. ജമാഅത്തെ ഇസ്ലാമിക്കും സിപിഎമ്മിനും വഴങ്ങുന്ന നിലപാടാണ് സർക്കാർ സ്വീകരിക്കുന്നതെന്ന് വി. മുരളീധരൻ ആരോപിച്ചു. നേരത്തെ നയപ്രഖ്യാപന ചടങ്ങിന് തുടക്കത്തിലും അവസാനത്തിലും വന്ദേമാതരം ഭാഗികമായി മാത്രമാണ് വായിച്ചത്. മുഴുവൻ ആലപിക്കേണ്ടെന്ന് മുഖ്യമന്ത്രി നിർദേശിച്ചതായും റിപ്പോർട്ടുകളുണ്ട്. ഇതിനെതിരെ ശക്തമായ പ്രതിഷേധം രേഖപ്പെടുത്തുന്നതായി വി. മുരളീധരൻ അറിയിച്ചു.