അഹമ്മദാബാദ്: ഗുജറാത്ത് കൃഷിവകുപ്പ് മന്ത്രി ബച്ചു ഖബാദിന്റെ മകന് ബല്വന്ത് സിങ് ഖബാദ് അഴിമതിക്കേസില് അറസ്റ്റിലായി. ദേവഗഡ് ബാരിയ, ധന്പുര് താലൂക്കുകളില് നിന്ന് 75 കോടി രൂപയുടെ തട്ടിപ്പ് നടത്തിയതിന് ദഹോദ് പൊലീസാണ് മന്ത്രിയുടെ മകനെ അറസ്റ്റ് ചെയ്തത്. മഹാത്മാഗാന്ധി ദേശീയ ഗ്രാമീണ തൊഴിലുറപ്പ് (MGNREGA) പദ്ധതിയുമായി ബന്ധപ്പെട്ടാണ് തട്ടിപ്പ് നടത്തിയത്.
അഴിമതി ആരോപണം ഉയര്ന്നതിനു പിന്നാലെ ബച്ചു ഖബാദിന്റെ മക്കളായ ബല്വന്ത് സിങ്ങിനും ഇളയ സഹോദരന് കിരണിനെതിരേയും പൊലീസ് അന്വേഷണം പ്രഖ്യാപിച്ചിരുന്നു. ഇതിനിടെ ഇരുവരും ചേര്ന്ന് മുന്കൂര് ജാമ്യത്തിനായി കോടതിയെ സമീപിച്ചു. പിന്നീട് ജാമ്യാപേക്ഷ പിന്വലിക്കുകയും ചെയ്തു. ഇതിന് ശേഷം ദിവസങ്ങള്ക്കുള്ളില് പൊലീസ് ബല്വന്ത് സിങ് ഖബാദിനെ അറസ്റ്റ് ചെയ്യുകയായിരുന്നു.
പ്രാഥമികാന്വേഷണത്തില് അഴിമതി തെളിഞ്ഞിട്ടുണ്ടെന്നും ജില്ലാ ഗ്രാമവികസന അതോറിറ്റിയുടെ (DRDA) എഫ്ഐആര് പ്രകാരമാണ് അറസ്റ്റ് ചെയ്തതെന്നും ദഹോദ് ഡിഎസ്പി ജഗദീഷ് ഭണ്ഡാരി പറഞ്ഞു.
തൊഴിലുറപ്പ് പദ്ധതികള്ക്കായുള്ള സാധനസാമഗ്രികള് വിതരണം ചെയ്യുന്നത് ബല്വന്ത് സിങ് ഖബാദ് നടത്തുന്ന ഏജന്സിയാണ്. എന്നാല് ചെലവ് തുകയുടെ കണക്കില് ഇവര് തിരിമറി നടത്തിയെന്നാണ് വിവരം. ഇതിന്റെ അടിസ്ഥാനത്തിലായിരുന്നു ഇവര്ക്കെതിരേയുള്ള അന്വേഷണം. മറ്റൊരു മകന് കിരണിനെ ഇതുവരെ അറസ്റ്റ് ചെയ്തിട്ടില്ല. ഇയാളുടെ പങ്ക് അന്വേഷിച്ചു വരികയാണ്.
സംഭവവുമായി ബന്ധപ്പെട്ട് അഞ്ച് പേരെ നേരത്തെ അറസ്റ്റ് ചെയ്തിരുന്നു. MGNREGA ബ്രാഞ്ചിലെ അക്കൗണ്ടന്റുമാരായ ജയ് വീര് നാഗോപി, മഹിപാല് സിങ് ചൗഹാന് എന്നിവരേയും, കുല്ദീപ് ബാരിയ, മംഗല് സിങ് പട്ടേലിയ, ടെക്നിക്കല് അസിസ്റ്റന്റ് മനീഷ് പട്ടേല് എന്നിവരേയും നേരത്തെ അറസ്റ്റ് ചെയ്തിരുന്നു.
