ഹ്യൂമനോയ്ഡ് റോബോട്ടുകളെ കുറിച്ചുള്ള വാർത്തകളും വീഡിയോകളും ലോകമാകെ ഇപ്പോൾ വലിയ ശ്രദ്ധ നേടുകയാണ്. മനുഷ്യനെ പോലെ നടക്കാനും സംസാരിക്കാനും ചിന്തിക്കാനും കഴിയുന്ന റോബോട്ടുകളാണ് ഹ്യൂമനോയ്ഡ് റോബോട്ടുകൾ. സാങ്കേതിക വിദ്യ അതിവേഗം മുന്നേറുന്ന ഈ കാലത്ത് ഇത്തരം റോബോട്ടുകൾ മനുഷ്യജീവിതം തന്നെ മാറ്റിമറിക്കുമെന്ന വിലയിരുത്തലുകളാണ് ഉയരുന്നത്.
ചൈനയിൽ യൂണിട്രി ജി1 എന്ന ഹ്യൂമനോയ്ഡ് റോബോട്ടുകൾ നടത്തിയ തകർപ്പൻ നൃത്തം സോഷ്യൽ മീഡിയയിൽ വൈറലായതോടെയാണ് ഈ ചർച്ചകൾ വീണ്ടും ശക്തമായത്. റോബോട്ടുകളുടെ ചലന കൃത്യതയും മനുഷ്യനെ പോലെ പ്രകടനം നടത്താനുള്ള കഴിവും ലോകത്തെ തന്നെ അമ്പരപ്പിച്ചു. ടെസ്ലയുടെ സിഇഒ ഇലോൺ മസ്ക് വരെ ഈ വീഡിയോയെക്കുറിച്ച് പ്രതികരിച്ചതോടെ, ഹ്യൂമനോയ്ഡ് റോബോട്ടുകളുടെ രംഗത്ത് ചൈന അമേരിക്കയെ പോലും മറികടക്കുന്നു എന്ന തരത്തിലുള്ള അഭിപ്രായങ്ങൾ വ്യാപകമായി പ്രചരിച്ചിരുന്നു.
ഇതിനിടെയാണ് ഇന്ത്യയിൽ നിന്നും സമാനമായ രീതിയിൽ ഒരു വാർത്ത പുറത്ത് വരുന്നത്. ചൈനയിലോ അമേരിക്കയിലോ അല്ല, ഇന്ത്യയിലെ ഐഐടി ബോംബെയിൽ നടന്ന ടെക്ഫെസ്റ്റ് 2025-ലാണ് ഒരു ഹ്യൂമനോയ്ഡ് റോബോട്ട് നൃത്തം ചെയ്ത് കാണികളെ ഞെട്ടിച്ചത്. രൺവീർ സിംഗ് അഭിനയിച്ച ‘ധുരന്ധർ’ എന്ന സിനിമയിലെ ഗാനത്തിനൊപ്പമാണ് ഈ റോബോട്ട് വേദിയിൽ നൃത്തം ചെയ്തത്. മനുഷ്യനെ പോലെ കൈകാലുകൾ ചലിപ്പിച്ച്, താളത്തിന് അനുസരിച്ച് ചുവടുകൾ വെച്ച് റോബോട്ട് നടത്തിയ പ്രകടനം കാണികൾ ആവേശത്തോടെ മൊബൈൽ ഫോണുകളിൽ പകർത്തി.
ഈ ദൃശ്യങ്ങൾ പിന്നീട് സാമൂഹിക മാധ്യമങ്ങളിൽ വൈറലായി മാറി. ഇന്ത്യയും ഹ്യൂമനോയ്ഡ് റോബോട്ടിക്സിന്റെ രംഗത്ത് പിന്നിലല്ലെന്ന സന്ദേശമാണ് ഇതിൽ നിന്ന് മനസിലാക്കാൻ സാധിക്കുന്നത്. സാങ്കേതികതയിൽ ആവിഷ്കരിച്ച കൃത്യത മാത്രമല്ല ഈ റോബോട്ടിന്റെ പ്രത്യേകത, വികാരഭരിതമായ പ്രകടനം കൂടിയാണെന്ന് മാധ്യമങ്ങൾ ഉൾപ്പടെയുള്ളവർ അഭിപ്രായപ്പെടുകയുണ്ടായി. മുഖഭാവങ്ങളും ശരീരഭാഷയും മനുഷ്യനെ പോലെ ആവിഷ്കരിക്കാൻ കഴിഞ്ഞതായിരുന്നു പ്രേക്ഷകരെ ഏറ്റവും അധികം അമ്പരപ്പിച്ചത്.
മധ്യപ്രദേശിലെ ഇൻഡാേറിൻ പ്രവർത്തിക്കുന്ന ബിദ്യുത് ഇന്നൊവേഷൻസ് എന്ന സ്ഥാപനമാണ് ഈ റോബോട്ട് വികസിപ്പിച്ചതെന്നാണ് പുറത്തുവരുന്ന വിവരങ്ങൾ. ഏഷ്യയിലെ തന്നെ ഏറ്റവും ശ്രദ്ധേയമായ ശാസ്ത്ര-സാങ്കേതിക മേളയായ ടെക്ഫെസ്റ്റിൽ ഹ്യൂമനോയ്ഡ് റോബോട്ടിക്സിലെ പുതിയ മുന്നേറ്റങ്ങൾ അവതരിപ്പിക്കാനാണ് ഈ നൃത്തപ്രകടനം ഒരുക്കിയതെന്ന് സംഘാടകരും വ്യക്തമാക്കി.
ഇന്ത്യയുടെ വളർച്ച എഐ സാങ്കേതിക മേഖലയിലൂടെയും പ്രതിഫലിക്കുന്നു എന്നതിന്റെ സൂചനയാണ് ഈ സംഭവത്തിലൂടെ വ്യക്തമാകുന്നത്. ആർട്ടിഫിഷ്യൽ ഇന്റലിജൻസ്, റോബോട്ടിക്സ്, മെഷീൻ ലേണിംഗ് തുടങ്ങിയ മേഖലകളിൽ ഇന്ത്യ വലിയ മുന്നേറ്റമാണ് നടത്തുന്നത്. ഐഐടികൾ, സ്റ്റാർട്ടപ്പുകൾ, സ്വകാര്യ ഗവേഷണ കേന്ദ്രങ്ങൾ എന്നിവ ചേർന്ന് ലോകോത്തര സാങ്കേതികവിദ്യകൾ വികസിപ്പിക്കുന്നു. മെഡിക്കൽ രംഗം, കൃഷി, വ്യവസായം, വിദ്യാഭ്യാസം എന്നിവയിൽ എഐയുടെ പ്രയോഗം ഇന്ത്യയിൽ ദിവസേന വർധിച്ചുവരികയാണ്.
ഹ്യൂമനോയ്ഡ് റോബോട്ടുകൾ പോലുള്ള സങ്കീർണ സംവിധാനങ്ങൾ ഇന്ത്യയിൽ തന്നെ രൂപകൽപ്പന ചെയ്യാനും വികസിപ്പിക്കാനും കഴിയുന്നത് രാജ്യത്തിന്റെ സാങ്കേതിക ശേഷിയുടെ തെളിവാണ്. ഈ നൃത്തപ്രകടനങ്ങൾ വെറും വിനോദത്തിനുള്ളതല്ല, ഭാവിയിലെ സാധ്യതകളുടെ സൂചന കൂടിയാണ്. മനുഷ്യരെ സഹായിക്കുന്ന സഹപ്രവർത്തകരായി, അപകടകരമായ ജോലികൾ ചെയ്യുന്ന യന്ത്രങ്ങളായി, മനുഷ്യർക്ക് മാനസിക പിന്തുണ നൽകുന്ന കൂട്ടുകാരായി പോലും ഹ്യൂമനോയ്ഡ് റോബോട്ടുകൾ മാറാൻ സാധ്യതയുണ്ട്.
അതിനൊപ്പം തന്നെ തൊഴിൽ അവസരങ്ങൾ, മനുഷ്യ-യന്ത്ര ബന്ധം തുടങ്ങിയ വിഷയങ്ങളിലും ചർച്ചകൾ അനിവാര്യമാണ്. ചുരുക്കത്തിൽ, ചൈനയിലെ വൈറൽ വീഡിയോയും ഐഐടി ബോംബെയിലെ റോബോട്ട് നൃത്തവും ലോകത്തിന് ഒരു കാര്യം വ്യക്തമാക്കുന്നു. ഹ്യൂമനോയ്ഡ് റോബോട്ടുകളുടെ കാലം അടുത്തെത്തിക്കഴിഞ്ഞു.
ഇന്ത്യയും ഈ സാങ്കേതിക വിപ്ലവത്തിന്റെ ഭാഗമാകുകയും എഐ രംഗത്ത് ശക്തമായ സാന്നിധ്യം സ്ഥാപിക്കുകയും ചെയ്യുന്നു. ശരിയായ ദിശയിൽ ഗവേഷണവും നിക്ഷേപവും തുടരുകയാണെങ്കിൽ, ഭാവിയിലെ റോബോട്ടിക്സും എഐ ലോകവും രൂപപ്പെടുത്തുന്നതിൽ ഇന്ത്യയ്ക്ക് നിർണായക പങ്ക് വഹിക്കാൻ സാധിക്കും.
