തിരുവനന്തപുരം: തിരുവനന്തപുരം ജനറല് ആശുപത്രിയില് ശസ്ത്രക്രിയയ്ക്കിടെ ഗൈഡ് വയര് നെഞ്ചില് കുരുങ്ങിയ സംഭവത്തില് പരാതിക്കാരി ഇന്ന് മെഡിക്കല് ബോര്ഡിന് മുന്പാകെ ഹാജരാകും. കാട്ടാക്കട കിള്ളി സ്വദേശിയായ സുമയ്യയുടെ നെഞ്ചില് നിന്ന് വയര് പുറത്തെടുക്കാതിരിക്കുന്നതാണ് ഉചിതം എന്നാണ് മെഡിക്കല് ബോര്ഡിന്റെ വിലയിരുത്തല്. ധമനികളോട് ഒട്ടിച്ചേര്ന്നതിനാല് ഗൈഡ് വയര് മാറ്റാന് ശ്രമിക്കുന്നത് സങ്കീര്ണമാകും എന്നാണ് നിഗമനം. വയര് കുടുങ്ങി കിടക്കുന്നത് കൊണ്ട് യുവതിക്ക് മറ്റ് ആരോഗ്യപ്രശ്നങ്ങള് ഉണ്ടാകില്ലെന്നും മെഡിക്കല് ബോര്ഡ് വിലയിരുത്തിയിരുന്നു. ഇക്കാര്യങ്ങള് സുമയ്യയെ ബോധ്യപ്പെടുത്താനാണ് ഇന്ന് മെഡിക്കല് ബോര്ഡ് ചേരുന്നത്.
