ടെഹ്റാന്: അന്താരാഷ്ട്ര ആണവോര്ജ്ജ സമിതിയുമായുള്ള സഹകരണം അവസാനിപ്പിക്കാനുള്ള ഇറാന്റെ നീക്കത്തിന് പാര്ലമെന്റിന്റെ അനുമതി. ഇതോടെ പരിശോധനകള്ക്ക് ഇനി ഇറാന്റെ അനുമതി വേണ്ടി വരും. ആക്രമണം ഇറാന്റെ ആണവ പദ്ധതിയെ വര്ഷങ്ങള് പുറകോട്ടടിച്ചതായി, ഇസ്രയേല് പ്രധാനമന്ത്രി ബെഞ്ചമിന് നെതന്യാഹു പറഞ്ഞു.ഇതേ അഭിപ്രായം തന്നെയാണ് അമേരിക്കന് പ്രസിഡന്റ് ഡോണള്ഡ് ട്രംപും പറഞ്ഞത്. പരസ്പരമുള്ള നിര്ണായക ചര്ച്ചകള്ക്ക് അമേരിക്കയും ഇറാനും ഒരുങ്ങുന്നതായാണ് നേതാക്കളുടെ പ്രതികരണങ്ങളില് നിന്നുള്ള സൂചനകള്.
നിലവില് ഇരു രാജ്യങ്ങളിലും പ്രക്ഷോഭങ്ങളില്ലെങ്കിലും അന്താരാഷ്ട്ര വേദികളില് ഇസ്രയേലിനും അമേരിക്കക്കും എതിരായ ആയുധങ്ങള് മൂര്ച്ച കൂട്ടുകയാണ് ഇറാന്. ഐഎഇഎയുമായുള്ള സഹകരണം അവസാനിപ്പിക്കാന് ഇറാന് പാര്ലമെന്റ് അനുമതി നല്കി. ഇതോടെ ഇനി പരിശോധനയ്ക്ക് ഇറാന് സുപ്രീം നാഷണല് കൗണ്സില് അനുമതി വേണ്ടി വരും. അമേരിക്കന് ആക്രമണത്തില് ഇറാന്റെ ആണവ സംവിധാനങ്ങള്ക്ക് കാര്യമായ കേടുപാടുകളുണ്ടായില്ലെന്ന റിപ്പോര്ട്ടുകള്ക്കിടയില് ട്രംപിനെ പിന്തുണച്ച് നെതന്യാഹു എത്തി. ഫോര്ദേയിലെ ആണവ സമ്പുഷ്ടീകരണ സംവിധാനം വരെ തകര്ത്തതായാണ് ബെഞ്ചമിന് നെതന്യാഹു ഇന്ന് പറഞ്ഞത്.
ഇതിനിടെ, അമേരിക്കയും – ഇറാനും പരസ്പരം ചര്ച്ചകള്ക്ക് ഒരുങ്ങുന്നതായും നേതാക്കളുടെ പ്രസ്താവനകള് സൂചിപ്പിക്കുന്നു.
അമേരിക്കയുമായുള്ള പ്രശ്നങ്ങള് പരിഹരിക്കാന് ചര്ച്ചയ്ക്ക് സന്നദ്ധമെന്ന് ഇറാന് പ്രസിഡണ്ടും ഇറാനുമായി അടുത്തയാഴ്ച്ച സംസാരിക്കുമെന്ന് ഡോണള്ഡ് ട്രംപും ഇന്ന് പറഞ്ഞു. യുദ്ധമവസാനിച്ച ശേഷം രാജ്യത്തോടുള്ള അഭിസംബോധനയില് രാജ്യത്തെ രാഷ്ട്രീയ തടവുകാര്ക്ക് കൂടി പ്രസിഡണ്ട് നന്ദി അറിയിച്ചത് ഭരണകൂടത്തിനെതിരായ നീക്കങ്ങളൊഴിവാക്കാന് കൂടുതല് ഐക്യത്തിന് ശ്രമിക്കുമെന്ന സൂചനയായി. ഇറാനും ഇസ്രയേലും പരസ്പരമുള്ള എതിര് നീക്കങ്ങള് സജീവമാണ്.
ഇറാന് സെന്ട്രല് ബാങ്കിനെ ഇസ്രയേല് തീവ്രവാദ സ്ഥാപനമായി പ്രഖ്യാപിച്ചു. തീവ്രവാദ ഫണ്ടിങ് എന്ന് കാട്ടിയാണിത്. യുദ്ധസമയത്ത് 700ലധികം പേരെയാണ് ചാരപ്രവര്ത്തനം സംശയിച്ച് ഇറാന് പിടികൂടിയത്. ഇസ്രയേല് ആക്രമണത്തില് ഗുരുതര പരിക്കേറ്റ ഇറാനിയന് റവലുഷണറി ഗാര്ഡ് കമാന്ഡര് അലി ഷദ്മാനി കൊല്ലപ്പെട്ടതായി ഇറാന് മാധ്യമങ്ങള് റിപ്പോര്ട്ട് ചെയ്തു. ഗാസയില് 7 സെനികര് കൊല്ലപ്പെട്ടതിന്റെ ഞെട്ടലിലായിരുന്നു ഇന്ന് ഇസ്രയേല് സേന. ഇറാന് വ്യോമപാത നാളെക്കൂടി നിരീക്ഷിച്ച ശേഷമാകും പൂര്ണമായി തുറക്കുക.
