വാഷിംഗ്ടൺ: ഇറാൻ–അമേരിക്ക സംഘർഷം കടുപ്പം പ്രാപിക്കുന്ന പശ്ചാത്തലത്തിൽ പശ്ചിമേഷ്യയിലേക്ക് വൻ സൈനിക സന്നാഹവുമായി അമേരിക്കൻ നാവികസേന നീങ്ങുന്നു. 2,000-ത്തിലധികം മറീൻ സൈനികരെ വഹിക്കുന്ന അത്യാധുനിക യുദ്ധക്കപ്പലായ യുഎസ്എസ് ട്രിപ്പോളി മേഖലയിലേക്ക് പുറപ്പെട്ടതായാണ് റിപ്പോർട്ടുകൾ. ഹോർമുസ് കടലിടുക്കിന് സമീപം ഇറാനുമായി ബന്ധപ്പെട്ട ആക്രമണങ്ങൾ വർധിക്കുന്നതിനിടെയാണ് ഈ നീക്കം.
ജപ്പാനിലെ ഒക്കിനാവ ആസ്ഥാനമായുള്ള 31-ാം മറൈൻ എക്സ്പെഡിഷണറി യൂണിറ്റിലെ ഏകദേശം 2,200 സൈനികരാണ് കപ്പലിലുള്ളത്. കര, കടൽ, ആകാശ മാർഗങ്ങളിലൂടെ ഒരേസമയം ആക്രമണം നടത്താൻ ശേഷിയുള്ള സജ്ജീകരണങ്ങളോടെയാണ് ട്രിപ്പോളി സഞ്ചരിക്കുന്നത്. പെന്റഗൺ വ്യക്തമാക്കിയതനുസരിച്ച്, ഈ കപ്പലിനൊപ്പം രണ്ട് അനുബന്ധ യുദ്ധക്കപ്പലുകളും ഉണ്ടെന്ന് റിപ്പോർട്ടുണ്ട്.
അമേരിക്ക ക്ലാസ് വിഭാഗത്തിൽപ്പെട്ട ആംഫീബിയസ് ആക്രമണ കപ്പലായ ട്രിപ്പോളി, എഫ്-35 ബി സ്റ്റെൽത്ത് ഫൈറ്ററുകൾ, എംവി-22 ഓസ്പ്രേ വിമാനങ്ങൾ, വിവിധ ഹെലികോപ്റ്ററുകൾ എന്നിവ വഹിക്കാൻ കഴിവുള്ളതാണ്. ‘ലൈറ്റ്നിങ് കാരിയർ’ എന്നറിയപ്പെടുന്ന ഈ കപ്പലിന് ഏകദേശം 844 അടി നീളവും 45,000 മുതൽ 50,000 ടൺ വരെ ഭാരവഹന ശേഷിയുമുണ്ട്. വിമാനങ്ങൾക്കും ഹെലികോപ്റ്ററുകൾക്കും മുൻഗണന നൽകുന്ന പ്ലാറ്റ്ഫോമായാണ് ഇത് രൂപകൽപ്പന ചെയ്തിരിക്കുന്നത്.
അതേസമയം, പശ്ചിമേഷ്യയിലേക്ക് പുതിയ സൈനികരെ അയക്കുന്ന കാര്യം അമേരിക്കൻ പ്രസിഡന്റ് ഡൊണാൾഡ് ട്രംപ് നിഷേധിച്ചു. മാർച്ച് 19-ന് മാധ്യമങ്ങളോട് സംസാരിക്കുമ്പോൾ, “താൻ സൈനികരെ എവിടേക്കും അയക്കുന്നില്ല; അയച്ചാലും അത് വെളിപ്പെടുത്തില്ല” എന്നായിരുന്നു അദ്ദേഹത്തിന്റെ പ്രതികരണം. ഇതിനിടെ, 50,000-ത്തിലധികം അമേരിക്കൻ സൈനികർ ഇതിനകം തന്നെ മേഖലയിൽ സജ്ജമാണെന്നാണു കണക്കുകൾ.
മാർച്ച് 15-ന് ദക്ഷിണ ചൈനാ കടലിലും 16-ന് സിംഗപ്പൂരിന് സമീപവും കണ്ടതായി റിപ്പോർട്ട് ചെയ്ത ട്രിപ്പോളി, ഉടൻ പശ്ചിമേഷ്യൻ തീരത്ത് എത്തുമെന്ന് കരുതുന്നു. സ്ഥിതിഗതികൾ ഇന്ത്യയുൾപ്പെടെയുള്ള രാജ്യങ്ങൾ അടുത്തുനിന്ന് നിരീക്ഷിച്ചുകൊണ്ടിരിക്കുകയാണ്.
