ന്യൂഡൽഹി: ഹൈദരാബാദിലെ നാഷണൽ അക്കാദമി ഓഫ് ലീഗൽ സ്റ്റഡീസ് ആൻഡ് റിസർച്ചിലെ (നൽസാർ) ബിരുദധാരികൾക്ക് അഭിഭാഷകരായി എൻറോൾ ചെയ്യാൻ അനുവദിക്കില്ലെന്ന ബാർ കൗൺസിൽ ഓഫ് ഇന്ത്യയുടെ തീരുമാനത്തെ സുപ്രീം കോടതി ചീഫ് ജസ്റ്റിസ് വിമർശിച്ചു.
വിദ്യാർഥികൾക്കെതിരെ ഒരു നടപടിയും സ്വീകരിക്കരുതെന്ന് ബാർ കൗൺസിലുകളോട് ചീഫ് ജസ്റ്റിസ് നിർദേശിച്ചു. വിദ്യാർഥികളും താനും തമ്മിലുള്ള സംഭാഷണത്തിൽ ഇടപെടാൻ ബാർ കൗൺസിലിന് എന്ത് അധികാരമാണുള്ളതെന്നും അദ്ദേഹം ചോദിച്ചു.
വിദ്യാർഥികളുടെ സമാധാനപരമായ പ്രതിഷേധത്തിനുള്ള അവകാശം തടയരുതെന്നും ചീഫ് ജസ്റ്റിസ് വ്യക്തമാക്കി. പഠനകാലത്ത് താനും വിദ്യാർഥി സമരങ്ങളിൽ പങ്കെടുത്തിട്ടുണ്ടെന്ന് അദ്ദേഹം പറഞ്ഞു. വിദ്യാർഥികൾക്ക് അവരുടെ അഭിപ്രായങ്ങൾ സമാധാനപരമായി പ്രകടിപ്പിക്കാൻ അവസരം നൽകണം. അവർ പറയുന്നത് തെറ്റാണെന്ന് തോന്നിയാലും പ്രതിഷേധിക്കാനുള്ള അവകാശം നിഷേധിക്കരുതെന്നും ചീഫ് ജസ്റ്റിസ് വ്യക്തമാക്കി.
