നെയ്റോബി: കെനിയയില് വാഹനാപകടത്തില് മരിച്ച മലയാളികളുടെ മൃതദേഹം നാട്ടിലെത്തിക്കുന്നതില് ഇടപെട്ട് മുഖ്യമന്ത്രി പിണറായി വിജയന്. ആവശ്യം ഉന്നയിച്ച് വിദേശകാര്യ മന്ത്രിക്ക് മുഖ്യമന്ത്രി കത്തയച്ചു. മൃതദേഹങ്ങള് നാട്ടിലെത്തിക്കാന് വിദേശകാര്യ മന്ത്രാലയം ഇടപെടണമെന്ന് ആവശ്യപ്പെട്ടാണ് കത്ത്. പരുക്കേറ്റവര്ക്ക് ആവശ്യമായ ചികിത്സ ലഭ്യമാക്കണമെന്നും മുഖ്യമന്ത്രി അഭ്യര്ത്ഥിച്ചു.
കെനിയയിലെ നെഹ്റൂറുവിലുണ്ടായ ബസ് അപകടത്തില് മരണമടഞ്ഞ മലയാളികളുടെ വിയോഗത്തില് മുഖ്യമന്ത്രി അനുശോചനം രേഖപ്പെടുത്തി.നെയ്റോബിയിലെ ഇന്ത്യന് ഹൈക്കമ്മീഷന് മരണപ്പെട്ടവരുടെ വിവരങ്ങള് ഔദ്യോഗികമായി അറിയിച്ചിട്ടില്ലെങ്കിലും 5 മലയാളികള് മരണപ്പെട്ടതായാണ് വിവരം പരുക്കേറ്റ മലയാളികള് ഉള്പ്പെടെയുളള ഇന്ത്യന് പൗരന്മാരെ നെയ്റോബിയിലെ ആശുപത്രികളിലേയ്ക്ക് മാറ്റുമെന്ന് ലഭിച്ചിരിക്കുന്ന വിവരം.
ജൂണ് ഒന്പതിന് ഇന്ത്യന് സമയം വൈകിട്ട് എഴു മണിയോടെയാണ് വിനോദസഞ്ചാരത്തിന് എത്തിയ 28 പേരടങ്ങുന്ന ഇന്ത്യന്സംഘം സഞ്ചരിച്ച ടൂറിസ്റ്റ് ബസ് അപകടത്തില് പെട്ടത്. ഖത്തറില് നിന്നും വിനോദസഞ്ചാരത്തിനായി എത്തിയവരാണിവര്.
നെയ്റോബിയില് നിന്നും 150 കിലോമീറ്റര് അകലെ നെഹ്റൂറുവിലായിരുന്നു അപകടം. അപകടവിവരം അറിഞ്ഞയുടന് തന്നെ കെനിയയിലെ ലോകകേരള സഭ മുന് അംഗങ്ങളായ ജി പി രാജ്മോഹന്, സജിത് ശങ്കര് എന്നിവരും കേരള അസോസിയേഷന് ഓഫ് കെനിയയിലെ അംഗങ്ങളും സ്ഥലത്തെത്തിയിരുന്നുവെന്നും മുഖ്യമന്ത്രി കൂട്ടിച്ചേര്ത്തു.
