കൊച്ചി: കുംഭമേള വൈറൽ താരം മൊണാലിസ ഭോസ്ലെയ്ക്ക് പൊലീസ് സംരക്ഷണം നൽകാൻ ഹൈക്കോടതി വീണ്ടും നിർദേശം നൽകി. മൊണാലിസ സമർപ്പിച്ച ഹർജിയിലാണ് ഇടക്കാല ഉത്തരവ്. പാലാരിവട്ടം പൊലീസിനാണ് ഹൈക്കോടതി സുരക്ഷ ഒരുക്കാൻ നിർദേശം നൽകിയത്. കേസിൽ പാലാരിവട്ടം പൊലീസിനെ ഹൈക്കോടതി സ്വമേധയാ കക്ഷിചേർക്കുകയും ചെയ്തു.
മൊണാലിസയ്ക്ക് നൽകിയിരുന്ന പൊലീസ് സംരക്ഷണം ഹൈക്കോടതി നേരത്തെ പിൻവലിച്ചിരുന്നു. എന്നാൽ ഇപ്പോൾ ഒരു വനിതാ പൊലീസ് ഉദ്യോഗസ്ഥയെ സംരക്ഷണത്തിനായി നിയോഗിച്ചതായി സർക്കാർ കോടതിയെ അറിയിച്ചു. ഹർജി രണ്ടാഴ്ചയ്ക്ക് ശേഷം വീണ്ടും പരിഗണിക്കും.
മഹാകുംഭമേളയിൽ രുദ്രാക്ഷമാലകൾ വിൽക്കുന്ന ദൃശ്യങ്ങൾ വൈറലായതോടെയാണ് മൊണാലിസ ദേശീയ ശ്രദ്ധ നേടിയത്. പിന്നീട് സിനിമയിലേക്കും എത്തിയ അവർ ഫർമാൻ ഖാനെ വിവാഹം കഴിച്ചു. വിവാഹത്തിന് പിന്നാലെ കുടുംബം എതിർപ്പുമായി രംഗത്തെത്തുകയും പരാതിയുടെ അടിസ്ഥാനത്തിൽ ഫർമാൻ ഖാനെതിരെ മധ്യപ്രദേശ് പൊലീസ് കേസ് രജിസ്റ്റർ ചെയ്യുകയും ചെയ്തിരുന്നു. പ്രായപൂർത്തിയാകാത്ത പെൺകുട്ടിയെ തട്ടിക്കൊണ്ടുപോയെന്നായിരുന്നു പരാതി. എന്നാൽ ഈ വിഷയത്തിൽ അന്വേഷണം തുടരുകയാണ്.
