കൊച്ചി: തുടര്ച്ചയായി മൂന്നാം വര്ഷവും പ്രവര്ത്തന ലാഭത്തില് കൊച്ചി മെട്രോ. കഴിഞ്ഞ 2024- 25 സാമ്പത്തിക വര്ഷം 33.34 കോടി രൂപയുടെ പ്രവര്ത്തന ലാഭമാണ് മെട്രോ നേടിയത്. തൊട്ടുമുന്വര്ഷത്തേക്കാള് 10.4 കോടി രൂപയുടെ വര്ധനയാണിത്. കൊച്ചി മെട്രോ സര്വ്വീസ് തുടങ്ങിയ 2017-18 കാലയളവില് 24.19 കോടി രൂപ പ്രവര്ത്തന നഷ്ടമായിരുന്നു രേഖപ്പെടുത്തിയത്.
2018- 19 കാലയളവില് പ്രവര്ത്തന നഷ്ടം 5.70 കോടിയായി കുറഞ്ഞിരുന്നു. എന്നാല് 2019- 20 വര്ഷം അത് 13.92 കോടിയായും 2020 – 21 ല് 56.56 കോടിയായും ഉയര്ന്നു. 2021-22 കാലയളവില് പ്രവര്ത്തന നഷ്ടം 34.94 കോടി രൂപയായിരുന്നു. 2022-23 സാമ്പത്തിക വര്ഷത്തില് മെട്രോ നഷ്ടത്തില് നിന്ന് കമ്പനി പ്രവര്ത്തന ലാഭത്തിലെത്തി. ആ വര്ഷം 5.35 കോടി രൂപയുടെ ലാഭമാണ് നേടിയത്. 2023-24 കാലയളവില് പ്രവര്ത്തന ലാഭം 22.94 കോടി രൂപയായി ഉയരുകയും ചെയ്തു.
ഇക്കഴിഞ്ഞ സാമ്പത്തിക വര്ഷത്തില് കൊച്ചി മെട്രോ ആകെ 182.37 കോടി രൂപയുടെ വരുമാനമാണ് നേടിയത്. ഇതില് ടിക്കറ്റില് നിന്നുള്ള വരുമാനം മാത്രം 111.88 കോടി രൂപയാണ്. 55.41 കോടി രൂപയാണ് ടിക്കറ്റിതര വരുമാനം. കണ്സള്ട്ടന്സിയില് നിന്ന് 1.56 കോടി രൂപയും നേടി. ഇതര മാര്ഗങ്ങളില് നിന്ന് 13.52 കോടി രൂപയും വരുമാനം നേടി. അതേസമയം കഴിഞ്ഞ സാമ്പത്തിക വര്ഷത്തെ പ്രവര്ത്തന ചിലവ് 149.03 കോടി രൂപയാണ്.
