തിരുവനന്തപുരം: പാപ്പനംകോട് കെഎസ്ആർടിസി ബസ് നിയന്ത്രണം നഷ്ടപ്പെട്ട് ലോട്ടറി കടയിലേക്ക് ഇടിച്ചുകയറി. ഇന്ന് പുലർച്ചെ ആറരയോടെയായിരുന്നു സംഭവം. ബസിൽ യാത്രക്കാരില്ലായിരുന്നു. അപകടത്തിൽ ബസിന്റെ ഡ്രൈവർ, കണ്ടക്ടർ, ലോട്ടറി വിൽപ്പനക്കാരൻ എന്നിവർക്ക് പരിക്കേറ്റു. ഡ്രൈവറുടെ പരിക്ക് ഗുരുതരമാണെന്ന് അറിയുന്നു. പരിക്കേറ്റവരെ തിരുവനന്തപുരം മെഡിക്കൽ കോളേജിൽ പ്രവേശിപ്പിച്ചു.
അമിത വേഗതയാണ് അപകടത്തിന് കാരണമായതെന്ന് ദൃക്സാക്ഷികൾ പറഞ്ഞു. സംഭവ സമയത്ത് റോഡിലും കടയിലും വലിയ തിരക്കില്ലാതിരുന്നത് കൂടുതൽ വലിയ അപകടം ഒഴിവായി. ഫയർഫോഴ്സ് എത്തിയാണ് പരിക്കേറ്റവരെ രക്ഷപ്പെടുത്തി ആശുപത്രിയിലേക്ക് മാറ്റിയത്. പോലീസ് സംഭവത്തെക്കുറിച്ച് അന്വേഷണം ആരംഭിച്ചു.
