കോട്ടയം: പതിറ്റാണ്ടുകൾ നീണ്ട ഇടതുപക്ഷ ഭരണത്തിന് അന്ത്യം കുറിച്ച് കുമരകം ഗ്രാമപഞ്ചായത്തിൽ നാടകീയമായ രാഷ്ട്രീയ നീക്കങ്ങൾക്കൊടുവിൽ സ്വതന്ത്ര സ്ഥാനാർത്ഥി എ.പി. ഗോപി പ്രസിഡന്റായി തിരഞ്ഞെടുക്കപ്പെട്ടു. ഏറ്റവും വലിയ ഒറ്റകക്ഷിയായ എൽ.ഡി.എഫിനെ അപ്രതീക്ഷിതമായി തളച്ച് കോൺഗ്രസും ബി.ജെ.പിയും സ്വതന്ത്ര സ്ഥാനാർത്ഥിയെ പിന്തുണച്ചതോടെയാണ് കുമരകത്ത് ഭരണമാറ്റത്തിന് വഴിയൊരുങ്ങിയത്.
നാടകീയമായ വോട്ടെടുപ്പും നറുക്കെടുപ്പും
തദ്ദേശ തിരഞ്ഞെടുപ്പിൽ ആർക്കും കേവല ഭൂരിപക്ഷം ലഭിക്കാതിരുന്ന പഞ്ചായത്തിൽ എട്ട് സീറ്റുകളുമായി എൽഡിഎഫാണ് ഏറ്റവും വലിയ ഒറ്റകക്ഷിയായിരുന്നത്. എൽ.ഡി.എഫിന് വേണ്ടി കെ.എസ്. സലിമോൻ പ്രസിഡന്റ് സ്ഥാനത്തേക്ക് മത്സരിച്ചപ്പോൾ, ഒന്നാം വാർഡിൽ നിന്നും വിജയിച്ച സ്വതന്ത്ര അംഗം എ.പി. ഗോപിയെ യുഡിഎഫും ബിജെപിയും പിന്തുണയ്ക്കുകയായിരുന്നു. കോൺഗ്രസിന്റെ 4 അംഗങ്ങളും ബിജെപിയുടെ 3 അംഗങ്ങളും സ്വതന്ത്രന് വോട്ട് ചെയ്തതോടെ ഇരു സ്ഥാനാർത്ഥികൾക്കും 8 വോട്ടുകൾ വീതം ലഭിച്ച് മത്സരം ടൈയിൽ കലാശിച്ചു. തുടർന്ന് നടന്ന നറുക്കെടുപ്പിലാണ് എ.പി. ഗോപി ഭാഗ്യത്തിന്റെ അകമ്പടിയോടെ കുമരകം പഞ്ചായത്ത് പ്രസിഡന്റായി തിരഞ്ഞെടുക്കപ്പെട്ടത്.
സി.പി.എം മുൻ പ്രവർത്തകന്റെ വിജയം
മുമ്പ് സി.പി.എം പ്രവർത്തകനായിരുന്ന എ.പി. ഗോപി 2005-ൽ ഇടതുപക്ഷ സ്ഥാനാർത്ഥിയായി മത്സരിച്ച് വിജയിച്ചിരുന്നു. എന്നാൽ പിന്നീട് പാർട്ടിയുമായി ഉണ്ടായ അഭിപ്രായ ഭിന്നതകളെ തുടർന്ന് 2010 മുതൽ സ്വതന്ത്രനായിട്ടാണ് അദ്ദേഹം മത്സരിക്കുന്നത്. ഇടതുപക്ഷത്തിന്റെ ഉറച്ച കോട്ടയായി കരുതപ്പെട്ടിരുന്ന കുമരകത്ത് 45 വർഷം നീണ്ട എൽ.ഡി.എഫ് ഭരണത്തിനാണ് ഇതോടെ അന്ത്യമായത്. കോൺഗ്രസും ബി.ജെ.പിയും കൈകോർത്ത ഈ അപ്രതീക്ഷിത നീക്കം ജില്ലയിലെ രാഷ്ട്രീയ വൃത്തങ്ങളിൽ വലിയ ചർച്ചയായി മാറിയിട്ടുണ്ട്.
