ചെന്നൈ: മദ്യലഹരിയിൽ ഓട്ടോറിക്ഷയിൽ യാത്ര ചെയ്യുന്നതിനിടെ വഴിയരികിലൂടെ നടന്നുപോയ സ്ത്രീയുടെ മേൽ മൂത്രമൊഴിച്ചെന്നാരോപിച്ച് യുവാവിനെ ആൾക്കൂട്ടം മർദിച്ച് കൊലപ്പെടുത്തി. ചെന്നൈ സ്വദേശിയായ കലൈസെൽവൻ (30) ആണ് കൊല്ലപ്പെട്ടത്. കഴിഞ്ഞ ബുധനാഴ്ചയാണ് സംഭവം നടന്നത്.
സുഹൃത്തിനൊപ്പം ഓട്ടോറിക്ഷയിൽ യാത്ര ചെയ്യുന്നതിനിടെയായിരുന്നു കലൈസെൽവൻ മദ്യലഹരിയിലായിരുന്നതെന്ന് പറയുന്നു. ഓട്ടോയിൽ നിന്നുകൊണ്ട് റോഡിലൂടെ നടന്നു പോയിരുന്ന സ്ത്രീയുടെ മേൽ ഇയാൾ മൂത്രമൊഴിച്ചെന്നാണ് ആരോപണം. ഇതിനെത്തുടർന്ന് സ്ത്രീയും കലൈസെൽവനും തമ്മിൽ വാക്കേറ്റം ഉണ്ടായി.
സംഭവം ശ്രദ്ധയിൽപ്പെട്ട നാട്ടുകാർ ഇടപെട്ടതോടെ തർക്കം രൂക്ഷമായി. തുടർന്ന് ആൾക്കൂട്ടം ചേർന്ന് കലൈസെൽവനെ മർദിച്ചതായാണ് റിപ്പോർട്ട്. ഗുരുതരമായി മർദനമേറ്റ യുവാവ് ബോധരഹിതനായി കുഴഞ്ഞുവീണു.
തുടർന്ന് ഇയാളെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിൽ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. സമീപ പ്രദേശങ്ങളിലെ സിസിടിവി ദൃശ്യങ്ങൾ പരിശോധിച്ച് ആക്രമണത്തിൽ പങ്കെടുത്തവരെ തിരിച്ചറിയാനുള്ള ശ്രമം പുരോഗമിക്കുകയാണെന്ന് പോലീസ് അറിയിച്ചു. കുറ്റക്കാരെ കണ്ടെത്തിയാൽ കർശന നടപടികൾ സ്വീകരിക്കുമെന്നും അധികൃതർ വ്യക്തമാക്കി.
