മലപ്പുറം: സുഹൃത്തുക്കൾ തമ്മിലുണ്ടായ വാക്കേറ്റത്തിനിടെ പരിക്കേറ്റ് ചികിത്സയിലായിരുന്ന 54കാരൻ മരിച്ചു. സംഭവത്തിൽ ഒരാളെ പൂക്കോട്ടുംപാടം പൊലീസ് അറസ്റ്റ് ചെയ്തു. പാലാങ്കര മടക്കുംമുട്ടിൽ ഷിബു (46)വിനെയാണ് അറസ്റ്റ് ചെയ്തത്.

നിലമ്പൂർ സിഐ ഇൻചാർജ് ഗോപകുമാറിന്റെ നേതൃത്വത്തിലായിരുന്നു അറസ്റ്റ്. പ്രതിയെ നിലമ്പൂർ കോടതിയിൽ ഹാജരാക്കി.

പാലാങ്കര പുന്നപ്പാല അസൈനാർ (54) ആണ് മരിച്ചത്. കഴിഞ്ഞ മാസം 23നാണ് സുഹൃത്തുക്കൾ തമ്മിൽ വാക്കേറ്റമുണ്ടായത്. ഇതിനിടെ അസൈനാർ തലയടിച്ച് വീണ് പരിക്കേൽക്കുകയായിരുന്നു.

ഗുരുതരമായി പരിക്കേറ്റ അസൈനാറിനെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ച് ചികിത്സ നൽകി വരികയായിരുന്നു. എന്നാൽ ഞായറാഴ്ച വൈകിട്ട് നാലോടെ ചികിത്സയിലിരിക്കെ മരണം സംഭവിച്ചു. സംഭവത്തിൽ പൂക്കോട്ടുംപാടം പൊലീസ് അന്വേഷണം തുടരുകയാണ്.