കൊച്ചി: കാലാവര്ഷം ആരംഭിച്ചതിനാല് ഭൂതത്താന്കെട്ട് ബാരേജ് ഷട്ടറുകള് ഇന്ന് തുറക്കും. ഷട്ടറുകള് ഘട്ടം ഘട്ടമായി ഉയര്ത്തി പെരിയാര് നദിയിലേയ്ക്ക് വെള്ളം ഒഴുക്കി വിടാനാണ് തീരുമാനം. പെരിയാറിന്റെ ഇരു കരയില് ഉള്ളവരും മറ്റ് ആവശ്യങ്ങള്ക്കായി നദിയില്നിന്ന് ഇറങ്ങുന്നവരും പ്രത്യേകം ജാഗ്രത പുലര്ത്തണമെന്ന് എറണാകുളം ജില്ലാ കളക്ടര് നിര്ദേശം നല്കി.
സംസ്ഥാനത്ത് ഇന്ന് മുതല് മൂന്ന് ദിവസം അതീവ ജാഗ്രത നിര്ദേശമാണുള്ളത്. മൂന്ന് ദിവസത്തേക്ക് അതിതീവ്ര മഴ മുന്നറിയിപ്പ് കാലാവസ്ഥാ കേന്ദ്രം പുറപ്പെടുവിച്ചതോടെയാണിത്. ഇന്ന് കണ്ണൂര്, കാസര്ഗോഡ് ജില്ലകളിലും നാളെ കണ്ണൂര്, കാസര്ഗോഡ് , വയനാട്, കോഴിക്കോട്, മലപ്പുറം ജില്ലകളിലുമാണ് മുന്നറിയിപ്പ്. മറ്റന്നാള് 11 ജില്ലകളില് റെഡ് അലര്ട്ടാണ്. തിരുവനന്തപുരം, കൊല്ലം, ആലപ്പുഴ ഒഴികെയുള്ള മറ്റ് ജില്ലകളിലാണ് റെഡ് അലര്ട്ട്. ഇന്ന് കണ്ണൂരും കാസര്ഗോഡ് ഒഴികെ എല്ലാ ജില്ലകളിലും ഓറഞ്ച് അലര്ട്ടാണ്.
കാസര്ഗോഡ് ,കണ്ണൂര്,കോഴിക്കോട്,മലപ്പുറം,പാലക്കാട് ഉള്പ്പെടെയുള്ള ജില്ലകളില് ഇടവിട്ട് ശക്തമായ മഴ തുടരുകയാണ്. കോഴിക്കോട് ജില്ലാ ദുരന്തനിവാരണ അതോറിറ്റി അടിയന്തര യോഗം ചേര്ന്നു. ജില്ലയിലെ മണ്ണിടിച്ചില് സാധ്യതാ പ്രദേശങ്ങളില് നിരീക്ഷണം ശക്തമാക്കാന് നിര്ദേശം നല്കി. രാവിലെ മുതല് പെയ്യുന്ന കനത്ത മഴയില് ആലുവ നഗരത്തിന്റെയും പരിസരപ്രദേശങ്ങളിലും ദേശീയപാതയിലും ഉള്പ്പെടെ വെള്ളക്കെട്ട് രൂപപ്പെട്ടു. ആലുവ പ്രൈവറ്റ് ബസ് സ്റ്റാന്ഡിന്റെ മുന്വശത്തെ റോഡുകള്, മാര്ക്കറ്റ് സര്വീസ് റോഡ്, തോട്ടക്കാട്ടുകര, ദേശീയപാതയില് കമ്പനിപ്പടി മെട്രോ സ്റ്റേഷന് സമീപവും വെള്ളക്കെട്ട് രൂപപ്പെട്ടു.
