കൊച്ചി: മുനമ്പം ഭൂമി കേസില് വഖഫ് ബോര്ഡ് നല്കിയ ഹര്ജി ഹൈക്കോടതി ഇന്ന് പരിഗണിക്കും. പറവൂര് സബ് കോടതിയിലെ രേഖകള് വിളിച്ചുവരുത്തണം എന്നാവശ്യപ്പെട്ട് വഖഫ് ബോര്ഡ് നല്കിയ ഹര്ജിയാണ് അവധിക്കാല ഡിവിഷന് ബെഞ്ച് പരിഗണിക്കുന്നത്. കേസില് കക്ഷി ചേരാന് മുനമ്പം സ്വദേശി ജോസഫ് ബെന്നി അപേക്ഷ നല്കിയിട്ടുണ്ട്.
വഖഫ് ബോര്ഡിന്റെ അപ്പീലില് ആവശ്യമായ രേഖകള് നല്കാനും അനുമതി തേടിയിട്ടുണ്ട്. ഈ സാഹചര്യത്തിലാണ് അപ്പീല് ഹൈക്കോടതിയുടെ പരിഗണനയ്ക്ക് വരുന്നത്. ജസ്റ്റിസുമാരായ ജി ഗിരീഷ്, കെവി ജയകുമാര് എന്നിവര് ഉള്പ്പെട്ട ബെഞ്ചാണ് ഹര്ജി പരിഗണിക്കുക. കേസില് അന്തിമ ഉത്തരവിറക്കുന്നതില് നിന്ന് കോഴിക്കോട് വഖഫ് ട്രൈബ്യൂണലിനെ നേരത്തെ ഹൈക്കോടതി വിലക്കിയിരുന്നു.
എന്നാല് വഖഫ് ട്രൈബ്യൂണലിലെ വാദം തുടരുന്നതിന് തടസമില്ലെന്നായിരുന്നു ഇടക്കാല ഉത്തരവ്.അപ്പീലില് ഫറൂഖ് കോളജ് മാനേജ്മെന്റ് ഉള്പ്പടെയുള്ള എതിര്കക്ഷികള് മറുപടി സത്യവാങ്മൂലം നല്കാനിരിക്കെയാണ് അപ്പീല് വീണ്ടും ഹൈക്കോടതിയുടെ പരിഗണനയ്ക്ക് വരുന്നത്.
