ശ്രീഹരിക്കോട്ട: മനുഷ്യനെ ബഹിരാകാശത്ത് എത്തിക്കാനുള്ള ഇന്ത്യയുടെ സ്വപ്ന പദ്ധതിയായ ‘ഗഗൻയാൻ’ ദൗത്യത്തിൽ നിർണായക നാഴികക്കല്ല് പിന്നിട്ട് ഐഎസ്ആർഒ. പരീക്ഷണങ്ങൾക്കായുള്ള ‘സബ്-ഓർബിറ്റൽ ലോഞ്ച് വെഹിക്കിൾ ഫോർ എക്സ്പിരിമെന്റ്സ്’ (SOLVE) റോക്കറ്റിന്റെ സോളിഡ് മോട്ടോറിന്റെ ആദ്യ ​ഗ്രൗണ്ട് ടെസ്റ്റ് വിജയകരമായി പൂർത്തിയാക്കി. ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിലുള്ള സ്റ്റാറ്റിക് ടെസ്റ്റ് ഫെസിലിറ്റിയിൽ വെച്ചായിരുന്നു ഈ സുപ്രധാന പരീക്ഷണം നടന്നത്.

ഗഗൻയാൻ പരീക്ഷണ ദൗത്യങ്ങൾ നടത്തുന്നതിനുള്ള ഒരു പ്രധാന ഘടകമാണ് സോൾവ് (SOLVE) സോളിഡ് മോട്ടോർ. ജൂലൈ 3നായിരുന്നു ഇതിന്റെ ആദ്യ ഭൂതല പരീക്ഷണം നടന്നത്. വിവിധ പരീക്ഷണ സാഹചര്യങ്ങളിൽ ഗഗൻയാൻ ക്രൂ മോഡ്യൂളിന്റെ വേഗത കുറയ്ക്കുന്നതിനുള്ള ഡിസെലറേഷൻ സംവിധാനം പരിശോധിച്ച് ഉറപ്പുവരുത്തുന്നതിനായുള്ള ‘ഇന്റഗ്രേറ്റഡ് പാരച്യൂട്ട് ടെസ്റ്റുകൾ’ (Integrated Parachute Tests) നടത്താനാണ് സോളിഡ് മോട്ടോർ അധിഷ്ഠിതമായ ഈ പ്ലാറ്റ്‌ഫോം ഐഎസ്ആർഒ വികസിപ്പിക്കുന്നത്. ഈ പരീക്ഷണ ദൗത്യങ്ങളിൽ ക്രൂ മോഡ്യൂളിനെ 10 മുതൽ 17 കിലോമീറ്റർ വരെ ഉയരത്തിൽ എത്തിച്ച ശേഷം റോക്കറ്റിൽ നിന്ന് വേർപെടുത്തും. തുടർന്ന് കടലിൽ പതിക്കുന്നതിന് മുൻപായി ക്രൂ മോഡ്യൂളിന്റെ വേഗത കുറയ്ക്കുന്നതിനായി 10 പാരച്യൂട്ടുകൾ ഘട്ടങ്ങളായി വിന്യസിക്കും.

പിഎസ്എൽവി റോക്കറ്റുകളിൽ ഉപയോഗിക്കുന്ന സ്ട്രാപ്പ്-ഓൺ മോട്ടോറിൽ ചില മാറ്റങ്ങൾ വരുത്തിയാണ് സോൾവിന്റെ സോളിഡ് സ്റ്റേജ് രൂപകൽപ്പന ചെയ്തിരിക്കുന്നത്. മെല്ലെ കത്തുന്ന പ്രൊപ്പല്ലന്റും, സെക്കൻഡറി ഇൻജക്ഷൻ ത്രസ്റ്റ് വെക്റ്റർ കൺട്രോൾ സംവിധാനത്തോടു കൂടിയ സ്ട്രെയിറ്റ് നോസിലും ഉൾപ്പെടെ ഗഗൻയാൻ പരീക്ഷണങ്ങൾക്ക് ആവശ്യമായ പരിഷ്‌കാരങ്ങൾ ഇതിൽ വരുത്തിയിട്ടുണ്ട്. പരീക്ഷണത്തിനിടെ മോട്ടോറിന്റെ പ്രവർത്തനക്ഷമത പ്രതീക്ഷിച്ച നിലവാരത്തിലായിരുന്നുവെന്ന് ഐഎസ്ആർഒ അറിയിച്ചു.

“യഥാർത്ഥ ദൗത്യത്തിലെ വിവിധ സാഹചര്യങ്ങളെ പുനഃസൃഷ്ടിച്ചുകൊണ്ട് ഗഗൻയാൻ ടെസ്റ്റ് മിഷനുകൾ കൂടുതൽ സുഗമമായി നടത്തുന്നതിനുള്ള വഴക്കമാണ് സോൾവ് (SOLVE) വാഹനം നൽകുന്നത്,” ഐഎസ്ആർഒ വ്യക്തമാക്കി.

കഴിഞ്ഞ ഏതാനും മാസങ്ങളായി ഗഗൻയാൻ ദൗത്യവുമായി ബന്ധപ്പെട്ട പ്രധാന പരീക്ഷണങ്ങൾ ഐഎസ്ആർഒ നടത്തിവരികയാണ്. രണ്ടാമത്തെ ഇന്റഗ്രേറ്റഡ് എയർ ഡ്രോപ്പ് ടെസ്റ്റും (IADT-02), ലേയിൽ വെച്ച് നടന്ന ‘മിഷൻ മിത്ര’ (Mission MITRA – Mapping of Interoperable Traits and Response Assessment) എന്ന ബിഹേവിയറൽ പഠനവും ഇതിൽ ഉൾപ്പെടുന്നു.

മിഷൻ മിത്രയുടെ ഭാഗമായി ദൗത്യത്തിലേക്ക് തിരഞ്ഞെടുക്കപ്പെട്ട നാല് ഇന്ത്യൻ ബഹിരാകാശ സഞ്ചാരികളെ ശാസ്ത്രജ്ഞരും എഞ്ചിനീയർമാരും മെഡിക്കൽ സംഘവുമടങ്ങുന്ന പാനലിന് മുന്നിൽ ഒരാഴ്ച നീണ്ടുനിന്ന പെരുമാറ്റ-മനശാസ്ത്ര പഠനങ്ങൾക്ക് വിധേയരാക്കിയിരുന്നു. ഗഗൻയാന്റെ ആദ്യ ആളില്ലാ പര്യവേക്ഷണം (uncrewed mission) 2026ന്റെ ആദ്യ പാദത്തിൽ വിക്ഷേപിക്കാൻ നിശ്ചയിച്ചിരുന്നെങ്കിലും നിലവിൽ അത് വൈകിയിട്ടുണ്ട്.

മൂന്ന് പേരടങ്ങുന്ന ബഹിരാകാശ സംഘത്തെ 400 കിലോമീറ്റർ ഉയരത്തിലുള്ള ഭ്രമണപഥത്തിൽ എത്തിച്ച് മൂന്ന് ദിവസത്തെ ദൗത്യത്തിന് ശേഷം ഇന്ത്യൻ സമുദ്രമേഖലയിൽ സുരക്ഷിതമായി തിരിച്ചിറക്കിക്കൊണ്ട് ഇന്ത്യയുടെ മനുഷ്യനെ ബഹിരാകാശത്ത് എത്തിക്കാനുള്ള ശേഷി തെളിയിക്കുക എന്നതാണ് ഗഗൻയാൻ ദൗത്യത്തിലൂടെ ഐഎസ്ആർഒ ലക്ഷ്യമിടുന്നത്.