കൊച്ചി: ആലപ്പുഴയിലെ ഹരിപ്പാട് നിന്ന് 50 കിലോ വരെ ഭാരം വഹിക്കാനാകുന്ന ചൈനീസ് നിർമിത ഡ്രോൺ പിടികൂടി. ഏകദേശം 20 ലക്ഷം രൂപ വിലമതിക്കുന്ന ഈ ഡ്രോൺ ഹരിപ്പാട് മേഖലയിൽ നടത്തിയ പരിശോധനയിലാണ് കണ്ടെടുത്തത്.
വലിയ ഡ്രോൺ പറക്കുന്നുവെന്ന രഹസ്യവിവരത്തെ തുടർന്ന് ആലപ്പുഴ ജില്ലാ പോലീസ് നടത്തിയ പരിശോധനയിലാണ് ഇത് പിടികൂടിയത്. തുടർന്ന് ഡ്രോൺ കസ്റ്റംസ് പ്രിവന്റീവ് വിഭാഗത്തിന് കൈമാറി. കസ്റ്റംസ് പരിശോധനയിൽ ഡിജിസിഎയുടെ അനുമതിയില്ലാതെ നിയമവിരുദ്ധമായി ഇന്ത്യയിലേക്ക് കൊണ്ടുവന്നതാണെന്ന് സ്ഥിരീകരിച്ചു.
ഡ്രോൺ 50 കിലോഗ്രാം വരെ ഭാരം വഹിക്കാൻ ശേഷിയുള്ളതാണെന്ന് കണ്ടെത്തി. രാജ്യസുരക്ഷ കണക്കിലെടുത്ത് വിദേശ ഡ്രോണുകളുടെ ഇറക്കുമതിയും ഉപയോഗവും കേന്ദ്ര സർക്കാർ നിരോധിച്ചിട്ടുള്ളതാണ്. ഹരിപ്പാട് കരുവാറ്റയിലെ ഒരു വീട്ടിൽ നിന്നാണ് ഡ്രോൺ കണ്ടെത്തിയത്. വിദേശത്ത് ജോലി ചെയ്യുന്ന ഒരു യുവാവാണ് ഉടമയെന്നാണ് വിവരം. ഇയാൾ ഇത് കൃഷി ആവശ്യങ്ങൾക്കായി കൊണ്ടുവന്നതാണെന്ന് പറയുന്നു. എന്നാൽ ഡ്രോൺ വാങ്ങിയ രേഖകളോ ഇറക്കുമതി ലൈസൻസോ ഇയാൾ ഹാജരാക്കിയിട്ടില്ല.
കസ്റ്റംസ് ഈ ഡ്രോൺ രാജ്യത്തേക്ക് എങ്ങനെ എത്തിയതെന്ന് അന്വേഷിച്ചു വരികയാണ്. സുരക്ഷാ ഭീഷണി ഉണ്ടോ എന്നും പരിശോധിക്കുന്നു. ഇത് സാധാരണ ദൃശ്യങ്ങൾ പകർത്തുന്ന ഡ്രോൺ അല്ല, മറിച്ച് കൃഷിയിടങ്ങളിൽ മരുന്ന് തളിക്കാനും വിതയ്ക്കാനും ഉപയോഗിക്കുന്ന ഉയർന്ന ശേഷിയുള്ള വ്യാവസായിക ഡ്രോൺ ആണെന്നാണ് റിപ്പോർട്ട്. നിയമവിരുദ്ധമായി ഇത് എത്തിച്ചതാണ് കേസിന് കാരണമായത്.
