ന്യൂഡൽഹി: ഒരു രാജ്യം ഒരു തെരഞ്ഞെടുപ്പ് പദ്ധതി വീണ്ടും സജീവ ചർച്ചയാക്കി ബിജെപി. ബിൽ പാർലമെന്റിൽ പാസാകാത്ത സാഹചര്യമുണ്ടായാലും എൻഡിഎ ഭരിക്കുന്ന സംസ്ഥാനങ്ങളിലെ തെരഞ്ഞെടുപ്പുകൾ 2029ൽ ഒരുമിച്ച് നടത്താനുള്ള സാധ്യതയാണ് ബിജെപി പരിഗണിക്കുന്നതെന്നാണ് റിപ്പോർട്ടുകൾ.
2029ലെ ലോക്സഭാ തെരഞ്ഞെടുപ്പിനൊപ്പം 22 സംസ്ഥാനങ്ങളിലെ നിയമസഭാ തെരഞ്ഞെടുപ്പുകളും നടത്തുന്നതിനെക്കുറിച്ച് ചർച്ച നടക്കുന്നുണ്ട്. ഉത്തർപ്രദേശ് ഉൾപ്പെടെയുള്ള സംസ്ഥാനങ്ങളിൽ ബിജെപി വീണ്ടും അധികാരത്തിലെത്തിയാൽ 2029ൽ തന്നെ നിയമസഭാ തെരഞ്ഞെടുപ്പ് നടത്തുന്നതും പരിഗണനയിലുണ്ടെന്നാണ് റിപ്പോർട്ട്. ഒരു രാജ്യം ഒരു തെരഞ്ഞെടുപ്പ് ബിൽ പാർലമെന്റിന്റെ ശീതകാല സമ്മേളനത്തിൽ പാസാക്കുന്നത് പ്രധാന അജണ്ടയാക്കാനാണ് സർക്കാർ നീക്കമെന്നും സൂചനയുണ്ട്.
ബിൽ പാസായാൽ കേരളം ഉൾപ്പെടെയുള്ള സംസ്ഥാനങ്ങളിലും 2029ൽ നിയമസഭാ തെരഞ്ഞെടുപ്പ് നടത്തേണ്ടിവരും. ബിൽ പാസായില്ലെങ്കിലും പരമാവധി സംസ്ഥാനങ്ങളിലെ തെരഞ്ഞെടുപ്പുകൾ 2029ലേക്ക് മാറ്റാനുള്ള സാധ്യതയാണ് ബിജെപി ചർച്ച ചെയ്യുന്നതെന്നാണ് റിപ്പോർട്ട്. അതേസമയം, വിഷയത്തിൽ പുറത്തുവരുന്ന അഭ്യൂഹങ്ങളോട് പ്രതികരിക്കാനില്ലെന്ന് കോൺഗ്രസ് വ്യക്തമാക്കി.
