തിരുവനന്തപുരം: അന്തർസംസ്ഥാന ലഹരി സംഘങ്ങളെ കേന്ദ്രീകരിച്ച് അന്വേഷണം ശക്തമാക്കാൻ ‘തൂഫാൻ ആന്റി നാർക്കോട്ടിക് ഇൻവെസ്റ്റിഗേഷൻ ടീം’ രൂപീകരിച്ച് സർക്കാർ. എറണാകുളം, കോഴിക്കോട്, തിരുവനന്തപുരം എന്നിവിടങ്ങളിലായി പ്രത്യേക അന്വേഷണ സംഘത്തിന്റെ യൂണിറ്റുകൾ പ്രവർത്തിക്കും. ആഭ്യന്തരമന്ത്രി രമേശ് ചെന്നിത്തലയാണ് ഇക്കാര്യം അറിയിച്ചത്.

തൂഫാന്റെ ഭാഗമായി ഇതുവരെ 10,918 കേസുകൾ രജിസ്റ്റർ ചെയ്തതായി മന്ത്രി പറഞ്ഞു. മലപ്പുറം എംഡിഎംഎ കേസിൽ നാല് പേരെ കൂടി പിടികൂടിയതോടെ അറസ്റ്റിലായവരുടെ എണ്ണം 13 ആയി. ഗുജറാത്തിൽ നിന്നും ചെന്നൈയിൽ നിന്നുമാണ് പ്രതികളെ പിടികൂടിയത്.

ഡൽഹി, പശ്ചിമ ബംഗാൾ, നോയിഡ എന്നിവിടങ്ങളിലേക്ക് ലഹരി കടത്തിയിരുന്നതായാണ് അന്വേഷണത്തിൽ കണ്ടെത്തിയത്. ലഹരി കടത്തിന്റെ ശൃംഖലയെക്കുറിച്ച് നിർണായക വിവരങ്ങൾ ലഭിച്ചിട്ടുണ്ടെന്നും പ്രതികൾക്ക് സാമ്പത്തിക സഹായം നൽകിയവരെക്കുറിച്ചും അന്വേഷണം പുരോഗമിക്കുകയാണെന്നും മന്ത്രി വ്യക്തമാക്കി. തൂഫാൻ രണ്ടാംഘട്ടം ഈ മാസം 28ന് ആരംഭിക്കുമെന്നും രമേശ് ചെന്നിത്തല അറിയിച്ചു.