തിരുവനന്തപുരം: പിഎസ്‌സി ചെയർമാന്റേയും അം​ഗങ്ങളുടേയും ശമ്പളം വർധിപ്പിക്കുവാൻ തീരുമാനം. മന്ത്രിസഭാ യോഗത്തിലാണ് തീരുമാനം. മറ്റ് സംസ്ഥാനങ്ങളിലെ പിഎസ്‌സി അം​ഗങ്ങളുടേയും ചെയർമാന്റേയും ശമ്പളം പരി​ഗണിച്ചാണ് വർധന എന്നാണ് വിശദീകരണം. ചെയർമാന്റെ ശമ്പളം ജില്ലാ ജഡ്ജിയുടെ സൂപ്പർ ടൈം സ്കെയിലിലെ പരമാവധി തുകക്ക് തുല്യമായി നിശ്ചയിച്ചു. പിഎസ്‌സി അംഗങ്ങളുടേത് ജില്ലാ ജഡ്ജിമാരുടെ സെലക്ഷൻ ​ഗ്രേ‍ഡ് സ്കെയിലിലെ പരമാവധി തുകക്ക് തുല്യവുമാക്കി. നിലവിൽ ചെയർമാന് 76,000 രൂപയാണ് അടിസ്ഥാന ശമ്പളം, അലവൻസുകൾ അടക്കം 2.26 ലക്ഷം രൂപ ലഭിക്കും.

അം​ഗങ്ങൾക്ക് 2.23 ലക്ഷം രൂപയും പ്രതിമാസം ലഭിക്കും. കൂടാതെ, വ്യാവസായിക ട്രിബ്യൂണലുകളിൽ പ്രിസൈഡിങ് ഓഫീസർമാരുടെ ശമ്പളവും അലവൻസുകളും സബോർഡിനേറ്റ് ജുഡീഷ്യറിയിലെ ജുഡീഷ്യൽ ഓഫീസർമാരുടേതിന് സമാനമായി പരിഷ്കരിക്കും. ശമ്പള വർധനവ് ആവശ്യപ്പെട്ട് പിഎസ്‌സി നേരത്തെ ധനവകുപ്പിന് കത്ത് അയച്ചിരുന്നു. സംസ്ഥാനം രൂക്ഷ​മായ സാമ്പത്തിക പ്രതിസന്ധിയിലൂടെ കടന്നുപോകുമ്പോൾ പിഎസ്‌സി അം​ഗങ്ങളുടെ ശമ്പള വർധനവ് വലിയ രാഷ്ട്രീയ വിവാദമാകാൻ സാധ്യതയുണ്ടെന്നാണ് വിലയിരുത്തൽ.