ധാക്ക: ബംഗ്ലാദേശ് യുദ്ധവിമാനം പരിശീലന പറക്കലിനിടെ സ്കൂളിന് മുകളില് തകര്ന്നുവീണുണ്ടായ അപകടത്തില് മരണം 27 ആയി. 171 പേര്ക്ക് പരിക്കേറ്റു. ചൈനീസ് നിര്മിത എഫ്-7 വിമാനമാണ് തകര്ന്നു വീണത്. ധാക്കയുടെ വടക്കന് മേഖലയിലുള്ള മൈല്സ്റ്റോണ് സ്കൂളിനു മുകളിലേക്കാണ് വിമാനം പതിച്ചത്.
തിങ്കളാഴ്ച ഉച്ചയ്ക്ക് ഒരു മണി കഴിഞ്ഞ് ടേക്ക് ഓഫിന് തൊട്ടുപിന്നാലെയാണ് വിമാനം തകര്ന്നുവീണത്. പതിവു പരിശീലനത്തിന്റെ ഭാഗമായി കുര്മിറ്റോലയിലെ ബംഗ്ലാദേശിന്റെ വ്യോമതാവളമായ ബീര് ഉത്തം എകെ ബന്ദേക്കറില്നിന്ന് പുറന്നുയര്ന്നതായിരുന്നു വിമാനം. നിമിഷങ്ങള്ക്കകം തകര്ന്നു വീഴുകയായിരുന്നു. കൊല്ലപ്പെട്ടവരില് ഭൂരിഭാഗവും വിദ്യാര്ത്ഥികളാണ്. രണ്ട് അധ്യാപകരും പൈലറ്റും മരിച്ചു. യന്ത്ര തകരാറാണ് വിമാനം തകരാന് കാരണമെന്നാണ് പ്രാഥമിക റിപ്പോര്ട്ട്. വിമാനത്തിന് യന്ത്രത്തകരാറുണ്ടായതോടെ ജനവാസം കുറഞ്ഞ പ്രദേശത്ത് ലാന്ഡിങിന് ശ്രമിക്കുമ്പോഴാണ് തകര്ന്നു വീണതെന്ന് ബംഗ്ലാദേശ് വ്യോമസേന ഇറക്കിയ കുറിപ്പില് പറയുന്നു.
