മധുര: ആറ് കിലോ കഞ്ചാവ് കൈവശം വച്ച് വിപണനം ചെയ്യാൻ ശ്രമിച്ച കേസിൽ പ്രതിക്ക് നാല് വർഷം കഠിനതടവും 40,000 രൂപ പിഴയും ശിക്ഷ വിധിച്ചു. തിരുവനന്തപുരം ഒന്നാം അഡിഷണൽ സെഷൻസ് കോടതി ജഡ്ജി കെ.പി. അനിൽകുമാറാണ് വിധി പ്രസ്താവിച്ചത്. മലയിൻകീഴ് മണിയറവിള ഹിമ ഭവനിൽ ഹരികുമാറിനെയാണ് കോടതി ശിക്ഷിച്ചത്. പിഴത്തുക അടയ്ക്കുന്നതിൽ വീഴ്ച വരുത്തിയാൽ നാല് മാസം കൂടി അധിക തടവ് അനുഭവിക്കണമെന്നും കോടതി ഉത്തരവിൽ വ്യക്തമാക്കി. നിലവിൽ മറ്റൊരു മയക്കുമരുന്ന് കേസിൽ ശിക്ഷിക്കപ്പെട്ട് മധുര സെൻട്രൽ ജയിലിൽ പത്ത് വർഷം തടവ് അനുഭവിച്ചു വരികയാണ് പ്രതിയായ ഹരികുമാർ.

2016 മാർച്ച് 27-നാണ് കേസിനാസ്പദമായ സംഭവം നടന്നത്. മോട്ടോർ സൈക്കിളിൽ കഞ്ചാവുമായി വരികയായിരുന്ന പ്രതിയെ എക്സൈസ് സർക്കിൾ ഇൻസ്‌പെക്ടർ ടി. അനിൽകുമാറിന്റെ നേതൃത്വത്തിലുള്ള സംഘം തടഞ്ഞു നിർത്തി പരിശോധന നടത്തുകയായിരുന്നു. പ്രതിയുടെ പക്കൽ നിന്ന് മൂന്ന് കിലോ കഞ്ചാവ് പിടിച്ചെടുത്തു. തുടർന്ന് നടത്തിയ വിശദമായ അന്വേഷണത്തിൽ പ്രതിയുടെ വീട്ടിൽ നിന്ന് മൂന്ന് കിലോ കഞ്ചാവ് കൂടി എക്സൈസ് സംഘം കണ്ടെത്തി. ഇതോടെ ആകെ ആറ് കിലോ കഞ്ചാവാണ് കേസുമായി ബന്ധപ്പെട്ട് പിടിച്ചെടുത്തത്.