ന്യൂഡൽഹി: സുപ്രീംകോടതി രജിസ്ട്രിക്ക് മുന്നിലുണ്ടായ ബഹളത്തിനിടെ രാഹുൽ ഗാന്ധി തന്നെ ദേഹത്ത് പിടിച്ച് വലിച്ച് നിലത്തിട്ടെന്ന ആരോപണവുമായി ഗർഭിണിയായ മാധ്യമപ്രവർത്തക റിച്ചാ പരാശർ. എന്നാൽ, ബിജെപിയുമായി ചേർന്ന് മാധ്യമപ്രവർത്തക കെട്ടിച്ചമച്ച ആരോപണമാണിതെന്ന് കോൺഗ്രസ് തിരിച്ചടിച്ചു. സംഭവവുമായി ബന്ധപ്പെട്ട വീഡിയോ ദൃശ്യങ്ങൾ ബിജെപി നേതാക്കൾ വ്യാപകമായി പ്രചരിപ്പിക്കുന്നുണ്ട്.
സുപ്രീംകോടതി രജിസ്ട്രിയിൽ രാഹുൽ ഗാന്ധിയും ഇന്ത്യാ സഖ്യ നേതാക്കളും എത്തിയപ്പോഴുണ്ടായ ബഹളത്തിനിടെയാണ് മാധ്യമപ്രവർത്തക നിലത്തുവീണത്. രാഹുൽ ഗാന്ധി തന്നെ പിടിച്ചുവലിച്ച് താഴെയിട്ടെന്നാണ് റിച്ചാ പരാശറിന്റെ ആരോപണം. സംഭവത്തെത്തുടർന്ന് ഡൽഹിയിലെ ഗംഗാറാം ആശുപത്രിയിൽ പ്രവേശിപ്പിച്ച മാധ്യമപ്രവർത്തകയുടെ വീഡിയോ ബിജെപി വക്താവ് പ്രദീപ് ഭണ്ഡാരി സമൂഹമാധ്യമങ്ങളിൽ പങ്കുവെച്ചു.
അതേസമയം, മാധ്യമപ്രവർത്തകയോട് മാറിനിൽക്കാൻ മാത്രമാണ് രാഹുൽ ഗാന്ധി ആവശ്യപ്പെട്ടതെന്നും സംഭവത്തിന് പിന്നിൽ ബിജെപി എംഎൽഎയുമായി ചേർന്നുള്ള ഗൂഢാലോചനയാണെന്നുമാണ് കോൺഗ്രസ് നേതാവ് അൽകാ ലാംബയുടെ പ്രതികരണം. വൺ ഇന്ത്യ എന്ന ഓൺലൈൻ മാധ്യമസ്ഥാപനത്തിനുവേണ്ടിയാണ് താൻ റിപ്പോർട്ടിംഗിനെത്തിയതെന്ന് റിച്ചാ പരാശർ വ്യക്തമാക്കിയിട്ടുണ്ട്.
അതിനിടെ, കഴിഞ്ഞ ദിവസത്തെ മാർച്ചിനിടെ ഡൽഹിയിലെ ബാരഖംബ റോഡിലൂടെ നടക്കുമ്പോൾ രാഹുൽ ഗാന്ധി മുട്ടുകൊണ്ട് ചില പ്രവർത്തകരെ തട്ടിമാറ്റുന്നതായി ആരോപിക്കപ്പെടുന്ന വീഡിയോയും ബിജെപി അനുകൂല സമൂഹമാധ്യമ അക്കൗണ്ടുകൾ പ്രചരിപ്പിക്കുന്നുണ്ട്. കർണാടക ഉപമുഖ്യമന്ത്രി ഡി.കെ. ശിവകുമാറിനെ രാഹുൽ ഗാന്ധി പിന്നിലേക്ക് തള്ളിമാറ്റിയെന്നും ബിജെപി ആരോപിച്ചു.
ചീഫ് ജസ്റ്റിസ് സൂര്യകാന്ത് രാജിവയ്ക്കണമെന്ന കോൺഗ്രസിന്റെ കേരള ഘടകത്തിന്റെ സമൂഹമാധ്യമ പോസ്റ്റിനെച്ചൊല്ലിയുള്ള വിവാദവും തുടരുകയാണ്. കോൺഗ്രസിന്റെ ലക്ഷ്യം ചീഫ് ജസ്റ്റിസ് സൂര്യകാന്തിനെ സ്ഥാനത്തുനിന്ന് നീക്കി രാജ്യത്ത് അരാജകത്വം സൃഷ്ടിക്കുകയാണെന്ന് കേന്ദ്രമന്ത്രി കിരൺ റിജിജു ആരോപിച്ചു.
സംഭവവുമായി ബന്ധപ്പെട്ട് കോൺഗ്രസും ബിജെപിയും പരസ്പരം ആരോപണങ്ങൾ ഉന്നയിക്കുന്നതിനിടെ, മാധ്യമപ്രവർത്തകയുടെ പരാതിയും പ്രചരിക്കുന്ന ദൃശ്യങ്ങളും രാഷ്ട്രീയ വിവാദത്തിന് കൂടുതൽ ആക്കം കൂട്ടിയിരിക്കുകയാണ്.
