കൊച്ചി: നെടുമ്പാശ്ശേരിയിൽ മിനി കൂപ്പർ കാറിടിച്ച് മൂന്ന് പേർ മരിച്ച സംഭവത്തിൽ പ്രതി സുഹൈൽ സജീവിനെതിരെ അന്വേഷണം ശക്തമാക്കി പൊലീസ്. കാർ മത്സരയോട്ടത്തിൽ ഏർപ്പെട്ടിരുന്നോ ഉൾപ്പെടെയുള്ള കാര്യങ്ങളിൽ വ്യക്തത തേടുന്നതിനായി പ്രതിയെ കസ്റ്റഡിയിൽ വാങ്ങാൻ പൊലീസ് അപേക്ഷ നൽകും. കേസിൽ ശക്തമായ നടപടി സ്വീകരിക്കുമെന്ന് ആഭ്യന്തര മന്ത്രിയും വ്യക്തമാക്കി.
മദ്യലഹരിയിൽ കാർ ഓടിച്ച് മൂന്ന് പേരുടെ മരണത്തിന് ഇടയാക്കിയെന്ന കേസിൽ സുഹൈൽ സജീവും കൂട്ടുപ്രതികളായ നിനവും ജോയലും റിമാൻഡിലാണ്. എറണാകുളം റൂറൽ പൊലീസിന്റെ പ്രത്യേക സംഘമാണ് കേസ് അന്വേഷിക്കുന്നത്. സുഹൈലിനെ കസ്റ്റഡിയിൽ വിട്ടുകിട്ടാനുള്ള അപേക്ഷ പൊലീസ് നൽകും. അപേക്ഷ അങ്കമാലി കോടതി പരിഗണിക്കും.
സുഹൈലും മറ്റ് പ്രതികളും മദ്യപിച്ചിരുന്നുവെന്നും മദ്യലഹരിയിലാണ് സുഹൈൽ കാർ ഓടിച്ചതെന്നുമാണ് റിമാൻഡ് റിപ്പോർട്ടിലുള്ളത്. കാർ മത്സരയോട്ടം നടത്തിയിരുന്നോ എന്നതടക്കമുള്ള കാര്യങ്ങളിൽ വിശദമായ അന്വേഷണം വേണമെന്നും റിപ്പോർട്ടിൽ വ്യക്തമാക്കുന്നു. പ്രതിക്ക് ജാമ്യം ലഭിച്ചാൽ പണവും സ്വാധീനവും ഉപയോഗിച്ച് കേസ് അട്ടിമറിക്കാൻ സാധ്യതയുണ്ടെന്നും പൊലീസ് ചൂണ്ടിക്കാട്ടിയിട്ടുണ്ട്.
എഫ്ഐആറിൽ പേരില്ലെന്ന വിവാദം അടിസ്ഥാനരഹിതമെന്ന് പൊലീസ്
കേസിലെ എഫ്ഐആറിൽ സുഹൈൽ സജീവിന്റെ പേര് ഉൾപ്പെട്ടിരുന്നില്ലെന്ന വിവാദം അടിസ്ഥാനരഹിതമാണെന്നാണ് പൊലീസിന്റെ വിശദീകരണം. ദൃക്‌സാക്ഷികളിൽനിന്ന് ലഭിച്ച പ്രാഥമിക വിവരങ്ങളുടെ അടിസ്ഥാനത്തിലാണ് ആദ്യം എഫ്ഐആർ രജിസ്റ്റർ ചെയ്തത്. തുടർന്നുള്ള അന്വേഷണത്തിലാണ് സുഹൈലിനെ പ്രതി ചേർത്തതെന്നും പൊലീസ് വ്യക്തമാക്കി.
പ്രതിയുടെ പ്രായവും റിമാൻഡ് നടപടികളും സംബന്ധിച്ച വിവാദത്തിലും പൊലീസ് വിശദീകരണം നൽകിയിട്ടുണ്ട്. നിയമപ്രകാരമാണ് കോടതിയുടെ ഉത്തരവനുസരിച്ച് പ്രതിയെ ബോസ്റ്റൽ സ്കൂളിലേക്ക് റിമാൻഡ് ചെയ്തതെന്നാണ് പൊലീസിന്റെ നിലപാട്. പ്രതികളെ ഒരു തരത്തിലും സംരക്ഷിക്കില്ലെന്ന് ആഭ്യന്തര മന്ത്രി രമേശ് ചെന്നിത്തലയും അറിയിച്ചു.
ബാറുകൾക്കെതിരെയും നടപടി
അപകടവുമായി ബന്ധപ്പെട്ട് എക്സൈസും മോട്ടോർ വാഹന വകുപ്പും നടപടികൾ ആരംഭിച്ചിട്ടുണ്ട്. പ്രായപൂർത്തിയാകുന്നതിന് മുമ്പ് ബാറിൽ പോയി മദ്യപിച്ചെന്ന ആരോപണത്തിൽ സുഹൈൽ സജീവിനെതിരെ എക്സൈസ് കേസെടുത്തു. മദ്യം നൽകിയ ബാറുകൾക്കെതിരെയും നടപടി ആരംഭിച്ചതായാണ് വിവരം.
അതേസമയം, സുഹൈൽ സജീവിന്റെ ഡ്രൈവിങ് ലൈസൻസ് റദ്ദാക്കുന്നതിനുള്ള നടപടികൾ മോട്ടോർ വാഹന വകുപ്പും തുടങ്ങി. ഇതിനിടെ, പ്രതി അങ്കമാലി മജിസ്‌ട്രേറ്റ് കോടതിയിൽ ജാമ്യാപേക്ഷയും സമർപ്പിച്ചിട്ടുണ്ട്.
മൂന്ന് പേരുടെ മരണത്തിനിടയാക്കിയ അപകടത്തിൽ കാറിന്റെ വേഗം, മത്സരയോട്ടം നടന്നിട്ടുണ്ടോ, മദ്യപിച്ചുള്ള ഡ്രൈവിങ് തുടങ്ങിയ കാര്യങ്ങളിൽ വ്യക്തത വരുത്താനാണ് പൊലീസ് ശ്രമിക്കുന്നത്. കസ്റ്റഡി അപേക്ഷയും ജാമ്യാപേക്ഷയും പരിഗണിക്കുന്നതോടെ കേസിൽ തുടർനടപടികൾ നിർണായകമാകും.
