തിരുവനന്തപുരം: നടിയുടെ വെളിപ്പെടുത്തലിന് പിന്നാലെ രാഹുല് മാങ്കൂട്ടത്തില് എംഎല്എക്കെതിരെ വീണ്ടും ആരോപണങ്ങള് ഉയര്ന്ന സാഹചര്യത്തില് യൂത്ത് കോണ്ഗ്രസ് അധ്യക്ഷ സ്ഥാനത്തുനിന്ന് രാഹുലിനെ മാറ്റിയേക്കും. പകരം അധ്യക്ഷ സ്ഥാനത്തേക്ക് അബിന് വര്ക്കിയെയോ കെഎം അഭിജിത്തിനേയോ പരിഗണിക്കാന് സാധ്യത. അധ്യക്ഷ സ്ഥാനത്തു നിന്നും രാഹുലിനെ മാറ്റിയാലും എംഎല്എ സ്ഥാനത്ത് തല്ക്കാലം തുടരും. യൂത്ത് കോണ്ഗ്രസ് അധ്യക്ഷ സ്ഥാനത്തു നിന്നും രാജി വാങ്ങാന് ഹൈക്കമാന്റാണ് നിര്ദ്ദേശിച്ചത്. അതേസമയം, രാഹുലിനെതിരെ ഉയര്ന്ന ആരോപണങ്ങളില് കടുത്ത അതൃപ്തിയിലാണ് പ്രതിപക്ഷ നേതാവ് വിഡി സതീശന്.
രാഹുല് വ്യക്തത വരുത്തണമെന്നാണ് യൂത്ത് കോണ്ഗ്രസ്സില് ആവശ്യം ഉയരുന്നത്. സംസ്ഥാന കമ്മിറ്റിയുടെ വാട്സ് ആപ് ഗ്രൂപ്പിലാണ് ചര്ച്ച നടക്കുന്നത്. വിഷയത്തില് രാഹുല് നിശബ്ദത വെടിയണമെന്നും വ്യക്തത വരുത്തണമെന്നും വനിതാ നേതാവ് ആവശ്യപ്പെട്ടു. ആരോപണം ശരി അല്ലെങ്കില് രാഹുല് വിശദീകരിക്കണമെന്നും കൂടുതല് നേതാക്കള് ആവശ്യപ്പെട്ടു. എന്നാല്, വിഷയത്തില് രാഹുല് മാങ്കൂട്ടത്തില് ഇതുവരേയും പ്രതികരിച്ചിട്ടില്ല. യൂത്ത് കോണ്ഗ്രസ് വാട്സ്ആപ്പ് ഗ്രൂപ്പില് ഇന്നലെ തുടങ്ങിയ ചര്ച്ച ഇപ്പോഴും തുടരുകയാണ്. രാഹുലിനെതിരെ രൂക്ഷ വിമര്ശനം ഉന്നയിച്ചത് സംസ്ഥാന ജനറല് സെക്രട്ടറി ആര് വി സ്നേഹയാണ്. സ്നേഹയുടെ വിമര്ശനത്തെ പിന്തുണച്ചു ജനറല് സെക്രട്ടറി വിപി ദുല്ഖിഫിലും രംഗത്തെത്തി. കൂടാതെ രാഹുലിനെതിരെ ചാണ്ടി ഉമ്മന് പക്ഷവും രംഗത്തെത്തിയിട്ടുണ്ട്. സംസ്ഥാന വൈസ് പ്രസിഡന്റ് വിഷ്ണു സുനില് പന്തളം രാജി ആവശ്യപ്പെട്ടു.
അതേസമയം, യുവ നേതാവിനെതിരായ വെളിപ്പെടുത്തലില് കൂടുതല് പ്രതികരണവുമായി റിനി ആന് ജോര്ജ് രംഗത്തെത്തി. ആരോപണ വിധേയനായ ആളുടെ പേര് ഇപ്പോള് വെളിപ്പെടുത്തില്ലെന്നും പറഞ്ഞ കാര്യങ്ങളില് ഉറച്ച് നില്ക്കുന്നു എന്നും റിനി ആന് ജോര്ജ് വ്യക്തമാക്കി
