തിരുവനന്തപുരം: തെക്കന് കേരളത്തിലും മധ്യകേരളത്തിലും ശക്തമായ മഴ തുടരാന് സാധ്യതയെന്ന് കേന്ദ്ര കാലാവസ്ഥാ വകുപ്പ്.
ഇന്ന് ഏഴ് ജില്ലകളില് യെല്ലോ അലേര്ട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലകളിലാണ് ഇന്ന് യെല്ലോ അലേര്ട്ട് നല്കിയിരിക്കുന്നത്. മലയോര മേഖലകളില് മഴ കനക്കാനും സാധ്യതയുണ്ട്.
ശബരിമല തീര്ത്ഥാടന കാലം ആരംഭിച്ചതിനാല് ഭക്തര്ക്കുള്ള മുന്നറിയിപ്പ്
രാവിലെ സന്നിധാനം, പമ്പ, നിലയ്ക്കല് എന്നിവിടങ്ങളില് ഒറ്റപ്പെട്ടയിടങ്ങളില് നേരിയ/ഇടത്തരം മഴയ്ക്ക് സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കിയിട്ടുണ്ട്.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്, പാലക്കാട്, മലപ്പുറം ജില്ലകളില് ഒറ്റപ്പെട്ടയിടങ്ങളില് ഇടത്തരം മഴയ്ക്ക് സാധ്യതയുണ്ടെന്നും മുന്നറിയിപ്പുണ്ട്.
ഇന്നലെ എറണാകുളം നഗരത്തിലുള്പ്പെടെ കനത്ത മഴയാണ് ലഭിച്ചത്. മഴയെ തുടര്ന്ന് കൊച്ചി ധനുഷ്കോടി ദേശീയപാതയില് ഗതാഗത നിയന്ത്രണം ഏര്പ്പെടുത്തിയിട്ടുണ്ട്. കൂമ്പന്പാറ മേഖലയില് മണ്ണിടിച്ചില് ഉണ്ടായതോടെ അടിമാലി- കല്ലാര് റോഡ് താല്ക്കാലികമായി അടച്ചു. മൂന്നാര് ഭാഗത്തേക്കുള്ള വാഹനങ്ങള് കല്ലാര്കുട്ടി റോഡ് വഴി തിരിച്ചുവിടുകയാണ്.
