ന്യൂഡൽഹി: ശബരിമല യുവതി പ്രവേശന കേസിൽ എൻഎസ്എസ് സുപ്രീം കോടതിയിൽ ഉന്നയിച്ച വാദങ്ങളെ ശക്തമായി തള്ളി തിരുവിതാംകൂർ ദേവസ്വം ബോർഡ്. ക്ഷേത്രങ്ങളിൽ പ്രവേശനം ആരെക്കൊടുക്കണമെന്നത് ആ മതവിഭാഗം തന്നെ തീരുമാനിക്കണമെന്ന എൻഎസ്എസ് നിലപാടിനെ ബോർഡ് എതിർത്തു.
ദേവസ്വം ബോർഡിന് വേണ്ടി ഹാജരായ മുതിർന്ന അഭിഭാഷകൻ അഭിഷേക് മനു സിങ്വി, എട്ട് പേജുള്ള വിശദമായ കുറിപ്പ് ഭരണഘടനാ ബെഞ്ചിന് സമർപ്പിച്ചു. പൊതുക്ഷേത്രങ്ങളിൽ ജാതിയുടേയോ വർഗ്ഗത്തിന്റേയോ അടിസ്ഥാനത്തിൽ നിയന്ത്രണങ്ങൾ ഏർപ്പെടുത്തുന്നത് അംഗീകരിക്കാനാവില്ലെന്നും, ഇത്തരത്തിലുള്ള വിവേചനം ഭരണഘടനാവിരുദ്ധമാണെന്നും ബോർഡ് വ്യക്തമാക്കി.
അതേസമയം, ക്ഷേത്രങ്ങളിൽ പ്രവേശിക്കുന്നവർ അവിടുത്തെ ആചാരങ്ങൾ പാലിക്കേണ്ടത് നിർബന്ധമാണെന്നും ബോർഡ് ചൂണ്ടിക്കാട്ടി. ശബരിമലയിലെ പ്രത്യേക സാഹചര്യത്തിൽ അയ്യപ്പൻ നൈഷ്ഠിക ബ്രഹ്മചാരിയായതിനാൽ യുവതി പ്രവേശന നിയന്ത്രണം തുടരേണ്ടതുണ്ടെന്നും ബോർഡ് കോടതിയെ അറിയിച്ചു.
എൻഎസ്എസ് മുന്നോട്ടുവച്ച വാദങ്ങൾക്കെതിരെ കൂടുതൽ ശക്തമായ നിലപാടുകളുമായി മുന്നോട്ട് പോകാനാണ് ദേവസ്വം ബോർഡിന്റെ തീരുമാനം. ഈ വിഷയത്തിൽ ബോർഡിന്റെ പുതിയ നീക്കം നിയമപരമായും രാഷ്ട്രീയമായും ശ്രദ്ധേയമായി വിലയിരുത്തപ്പെടുന്നു.
