ടോക്കിയോ: ജപ്പാനിലെ ആദ്യ വനിതാ പ്രധാനമന്ത്രിയായി സനയ് തകയ്ചി (64) തിരഞ്ഞെടുക്കപ്പെട്ടു. നിലവിലുള്ള പ്രധാനമന്ത്രി ഷിഗേറു ഇഷിബ രാജിവച്ച ഒഴിവിലേക്കാണ് ഭരണകക്ഷിയായ ലിബറല് ഡെമോക്രാറ്റിക് പാര്ട്ടി സനയ് തകയ്ചിയെ തിരഞ്ഞെടുത്തത്. പാര്ട്ടിയിലെ തീവ്ര വലതുപക്ഷ വിഭാഗത്തിന്റെ പ്രതിനിധിയായ തകയ്ചി 15ന് ചുമതലയേല്ക്കും. 1993 മുതല് പാര്ലമെന്റംഗമായ തകയ്ചി പലതവണ മന്ത്രിയായിട്ടുണ്ട്.
ബ്രിട്ടനില് പ്രധാനമന്ത്രിയായിരുന്ന മാര്ഗരറ്റ് താച്ചറെ ഹീറോ ആയി കാണുന്ന തകയ്ചി ‘ജപ്പാനിലെ താച്ചര്’ എന്നാണറിയപ്പെടുന്നത്. സാമ്പത്തിക മേഖലയിലെ മാന്ദ്യവും വിലക്കയറ്റവും മൂലം ഉണ്ടായ ജനരോഷത്തെ പുതിയ നേതാവിലൂടെ മറികടക്കാനാണ് ലിബറല് ഡെമോക്രാറ്റിക് പാര്ട്ടി ലക്ഷ്യമിടുന്നത്. യുഎസുമായുള്ള ബന്ധം ശക്തിപ്പെടുത്തുമെന്നും വിദേശ നിക്ഷേപം ആകര്ഷിക്കാന് ‘ജപ്പാന് തിരിച്ചെത്തി’ എന്ന സന്ദേശം പ്രചരിപ്പിക്കുമെന്നും തകയ്ചി പറഞ്ഞു.
കഴിഞ്ഞ ഒക്ടോബറിലാണ് ഇഷിബ പ്രധാനമന്ത്രിയായത്. വിലക്കയറ്റം പിടിച്ചുനിര്ത്താനും പാര്ട്ടിയെ നവീകരിക്കാനും ലക്ഷ്യമിട്ടുള്ള നയപദ്ധതികളുമായി ഭരണം തുടങ്ങിയെങ്കിലും തൊട്ടു പിന്നാലെ നടന്ന അധോസഭ തിരഞ്ഞെടുപ്പില് പാര്ട്ടിക്കും സഖ്യകക്ഷികള്ക്കും ഭൂരിപക്ഷം നഷ്ടമായി. ജൂലൈയിലെ പാര്ലമെന്റ് തിരഞ്ഞെടുപ്പിലെ പാര്ട്ടിയുടെ ദയനീയ പരാജയത്തിനുശേഷമാണ് ഷിഗേറു ഇഷിബ രാജി പ്രഖ്യാപിച്ചത്.
