റിയാദ്: നിലവിലെ അസാധാരണ സാഹചര്യങ്ങൾ പരിഗണിച്ച് സൗദി അറേബ്യ വിദേശികൾക്കായി വിസ ഇളവുകൾ പ്രഖ്യാപിച്ചു. മടക്കയാത്ര തടസ്സപ്പെട്ടവർക്കാണ് ഈ സൗകര്യം ലക്ഷ്യമിടുന്നത്. ഫെബ്രുവരി 25 (റമദാൻ 8, 1447 ഹിജ്റി) മുതൽ വിസ കാലാവധി അവസാനിച്ചവർക്ക് 2026 ഏപ്രിൽ 18 വരെ സമയം അനുവദിച്ചിട്ടുണ്ട്.
സൗദി ആഭ്യന്തര മന്ത്രാലയം വ്യക്തമാക്കുന്നതനുസരിച്ച്, വിസിറ്റ് വിസ, ഉംറ വിസ, ട്രാൻസിറ്റ് വിസ, ഫൈനൽ എക്സിറ്റ് വിസ എന്നിവയുള്ളവർക്ക് രണ്ട് തരത്തിലുള്ള ഇളവുകളാണ് ലഭ്യമാക്കുന്നത്.
ഒന്നാമതായി, വിസ ദീർഘിപ്പിക്കാൻ ആഗ്രഹിക്കുന്നവർക്ക് ഫെബ്രുവരി 25 മുതൽ കാലാവധി കഴിഞ്ഞ വിസകൾ സ്പോൺസറുടെ അപേക്ഷ പ്രകാരം ഏപ്രിൽ 18 വരെ പുതുക്കാം. ഇതിനായി അബ്ഷിർ പ്ലാറ്റ്ഫോം വഴി നിശ്ചിത ഫീസ് അടച്ച് നടപടികൾ പൂർത്തിയാക്കാം.
രണ്ടാമതായി, നാട്ടിലേക്ക് മടങ്ങാൻ ആഗ്രഹിക്കുന്നവർക്ക് വിസ ദീർഘിപ്പിക്കാതെ, അധിക ഫീസോ പിഴയോ ഇല്ലാതെ തന്നെ സൗദിയിലെ അന്താരാഷ്ട്ര വിമാനത്താവളങ്ങൾ വഴി നേരിട്ട് യാത്ര ചെയ്യാൻ അനുമതിയുണ്ട്. എന്നാൽ ഈ ഇളവ് ഫെബ്രുവരി 25 മുതൽ വിസ കാലാവധി കഴിഞ്ഞവർക്കാണ് ബാധകമാകുക.
ഈ ആനുകൂല്യം ഉപയോഗിക്കുന്നവർ നിർബന്ധമായും 2026 ഏപ്രിൽ 18-നകം രാജ്യം വിടണമെന്ന് മന്ത്രാലയം മുന്നറിയിപ്പ് നൽകി. സമയപരിധി ലംഘിക്കുന്നവർക്കെതിരെ നിലവിലുള്ള നിയമപ്രകാരം കർശന നടപടികൾ സ്വീകരിക്കുമെന്നും അധികൃതർ വ്യക്തമാക്കി.
