തിരുവനന്തപുരം: കേരള തീരത്ത് അപകടത്തില്പെട്ട എംഎസ്സി എൽസ 3 എന്ന കപ്പലിലെ കെമിക്കലുകളുടെ കൈകാര്യം ചെയ്യല്, പാരിസ്ഥിതിക പ്രശ്നങ്ങള് എന്നിവയുമായി ബന്ധപ്പെട്ട് വിദഗ്ധരുടെ യോഗം ചേര്ന്നു. ഈ വിഷയത്തില് ആഗോള രംഗത്ത് അറിയപ്പെടുന്ന വിദഗ്ദ്ധൻ ഡോ. മുരളി തുമ്മാരുകുടി, സംസ്ഥാന ദുരന്ത നിവാരണ അതോറിറ്റി അധികൃതര് എന്നിവരും ആഗോള തലത്തിലെ വിദഗ്ധരും കേരള സര്ക്കാരില് കപ്പല് അപകടം കൈകാര്യം ചെയ്യുന്ന വകുപ്പുകളും ചേര്ന്നായിരുന്നു യോഗം.
തീരത്ത് അടിയുന്ന അപൂര്വ്വ വസ്തുക്കള്, കണ്ടയ്നര് എന്നിവ കണ്ടാല് സ്വീകരിക്കേണ്ട മാര്ഗ്ഗ നിര്ദ്ദേശങ്ങള് സംബന്ധിച്ച് തീരദേശ തദ്ദേശ സ്വയംഭരണ സ്ഥാപനങ്ങള്ക്കും മത്സ്യ തൊഴിലാളികൾക്ക് നിര്ദ്ദേശം നല്കിയിട്ടുണ്ട്. കൂടാതെ കപ്പല് മുങ്ങിയ സ്ഥലത്തു നിന്ന് 20 നോട്ടിക്കല് മൈല് പ്രദേശത്ത് മത്സ്യ ബന്ധനം പൂര്ണമായും ഒഴിവാക്കിയിട്ടുണ്ട്. എണ്ണപ്പാട തീരത്തെത്തിയാല് കൈകാര്യം ചെയ്യാനായി മലിനീകരണ നിയന്ത്രണ ബോര്ഡിന്റെ നേതൃത്വത്തില് റാപ്പിഡ് റസ്പോണ്സ് ടീമുകളെ സജ്ജമാക്കിയിട്ടുണ്ട്. ഓയില് ബൂം അടക്കമുള്ളവ പ്രാദേശികമായി സജ്ജീകരിച്ച് എല്ലാ പൊഴി, അഴിമുഖങ്ങളിലും നിക്ഷേപിക്കാന് നിര്ദ്ദേശിച്ചിട്ടുണ്ട്.
പ്ലാസ്റ്റിക് തരികളെ തീരത്തു നിന്നും ഒഴിവാക്കാന് സന്നദ്ധ പ്രവര്ത്തകരെ നിയോഗിച്ചു. ഡ്രോണ് സര്വ്വേ അടക്കം നടത്തി ഓരോ 100 മീറ്ററിലും സന്നദ്ധ പ്രവര്ത്തകരെ നിയോഗിച്ച് പ്ലാസ്റ്റിക് തരികള് നീക്കം ചെയ്യാനാണ് നിലവിലെ ശ്രമം. പോലീസ്/അഗ്നിരക്ഷാസേന/മലിനീകരണ നിയന്ത്രണ ബോര്ഡ് എന്നീ വകുപ്പിലെ ഉദ്യോഗസ്ഥരെ ഇതിന്റെ ഏകോപനത്തിനായി നിയോഗിച്ചിട്ടുണ്ട്. അപകടകരമായ രീതിയില് ഒരു നടപടിയും സന്നദ്ധ പ്രവര്ത്തകര് സ്വീകരിക്കുന്നില്ല എന്ന് സൂപ്പര്വൈസര്മാര് ഉറപ്പുവരുത്തണം. പൊതുജനങ്ങളുടെ സുരക്ഷ പരിസ്ഥിതി സംരക്ഷണം, മത്സ്യബന്ധനമേഖലുടെ സംരക്ഷണം എന്നിവ മുന്നിര്ത്തിയുള്ള പ്രവര്ത്തനങ്ങള്ക്കാണ് സര്ക്കാര് ഈ ഘട്ടത്തില് മുന്ഗണന നല്കുന്നത്.
