കൊച്ചി: താരസംഘടനയായ ‘അമ്മ’യിൽ പവർ ഗ്രൂപ്പ് ഉണ്ടെന്ന് നടി ശ്വേത മേനോൻ. ഫേസ്ബുക്കിൽ പങ്കുവെച്ച കുറിപ്പിലൂടെയാണ് അവർ പ്രതികരിച്ചത്. മലയാള സിനിമയിലെ പവർ ഗ്രൂപ്പിനെ ഒരു സാധാരണ സ്ത്രീക്ക് ഒറ്റയ്ക്ക് നേരിടാൻ കഴിയില്ലെന്ന് ശ്വേത പറഞ്ഞു. ‘അമ്മ’യുടെ മുൻ പ്രസിഡന്റ് മോഹൻലാൽ പോലും സ്ഥാനം രാജിവെച്ച സാഹചര്യമാണ് ഉണ്ടായതെന്നും അവർ ചൂണ്ടിക്കാട്ടി.
തന്റെ പോരാട്ടം ഏതെങ്കിലും സ്ഥാനത്തിനോ വ്യക്തിപരമായ നേട്ടത്തിനോ വേണ്ടിയല്ലായിരുന്നെന്ന് ശ്വേത വ്യക്തമാക്കി. സംഘടനയിൽ സാമ്പത്തിക ക്രമക്കേടുകൾ നടത്തിയവർക്കും ചില കുറ്റാരോപിതർക്കുമെതിരെയായിരുന്നു തന്റെ പ്രതിഷേധമെന്ന് അവർ പറഞ്ഞു. പവർ ഗ്രൂപ്പിന്റെ സാന്നിധ്യം ഇപ്പോൾ എല്ലാവർക്കും വ്യക്തമായത് തന്റെ പോരാട്ടത്തിന്റെ വിജയമാണെന്നും അവർ അഭിപ്രായപ്പെട്ടു.
‘അമ്മ’യുടെ ലക്ഷ്യം സാമ്പത്തികമായി ബുദ്ധിമുട്ടുന്ന അംഗങ്ങളെ സഹായിക്കുകയാണെന്ന് ശ്വേത പറഞ്ഞു. അതിനായി ഫണ്ട് കണ്ടെത്താൻ മോഹൻലാലും മമ്മൂട്ടിയും ഉൾപ്പെടെയുള്ള താരങ്ങൾ വിവിധ പരിപാടികളിൽ പങ്കെടുക്കാറുണ്ടെന്നും അവർ വ്യക്തമാക്കി. സഹായം നൽകുന്നവർ ഏത് മതത്തിൽപ്പെട്ടവരാണെന്നോ ആരാണെന്നോ നോക്കാതെ എല്ലാവരെയും ഒരേ മനസ്സോടെയാണ് സംഘടന സ്വീകരിച്ചിട്ടുള്ളതെന്നും അവർ കൂട്ടിച്ചേർത്തു.
അംഗങ്ങളുടെ ക്ഷേമത്തിനായി മാറ്റിവെച്ച ഫണ്ടിൽ ചിലർ സാമ്പത്തിക ക്രമക്കേടുകൾ നടത്തിയതായി താൻ കണ്ടെത്തിയെന്നും ശ്വേത പറഞ്ഞു. ഈ വിഷയങ്ങൾ ചോദ്യം ചെയ്തതോടെയാണ് തന്നെ അപമാനിക്കാൻ ശ്രമങ്ങൾ തുടങ്ങിയതെന്നും അവർ ആരോപിച്ചു. ജനറൽ ബോഡി യോഗത്തിനിടെ കൈയേറ്റത്തിന് പോലും ശ്രമം ഉണ്ടായെന്നും അതിനെ തുടർന്നാണ് ‘അമ്മ’യിൽ നിന്ന് പിന്മാറുന്നതിനെക്കുറിച്ച് ചിന്തിച്ചതെന്നും ശ്വേത മേനോൻ വ്യക്തമാക്കി.
