കോഴിക്കോട്: 2025-26 വാർഷിക പദ്ധതിയുടെ ഭാഗമായി മടവൂർ ഗ്രാമപഞ്ചായത്തിൽ തെരുവുനായ്ക്കൾക്കുള്ള പേവിഷബാധ പ്രതിരോധ കുത്തിവെപ്പ് (Anti-Rabies Vaccination) ആരംഭിച്ചു . പദ്ധതിയുടെ ഉദ്ഘാടനം ഫെബ്രുവരി 14 ശനിയാഴ്ച ഗ്രാമപഞ്ചായത്ത് പ്രസിഡന്റ് ബഹു. സഫിയ മുഹമ്മദ് നിർവഹിച്ചു .
കരിപ്പൂർ പുറായിൽ വെച്ചാണ് ഉദ്ഘാടന ചടങ്ങുകൾ നടന്നത്. പഞ്ചായത്തിന്റെ വിവിധ ഭാഗങ്ങളിൽ അലഞ്ഞുതിരിഞ്ഞു നടക്കുന്ന നായകളെ പിടികൂടി ശാസ്ത്രീയമായി പ്രതിരോധ കുത്തിവെപ്പ് നൽകാനാണ് ഈ പദ്ധതിയിലൂടെ ലക്ഷ്യമിടുന്നത്. പൊതുജനങ്ങളുടെ സുരക്ഷ മുൻനിർത്തി നടപ്പിലാക്കുന്ന ഈ പ്രവർത്തനത്തിൽ വാർഡ് തലത്തിലുള്ള സഹകരണം അധികൃതർ അഭ്യർത്ഥിച്ചു.
പൊതുജന ശ്രദ്ധയ്ക്ക്:
• ആരാമ്പ്രം പ്രദേശത്ത് തെരുവുനായ്ക്കൾ കൂടുതലായി കാണപ്പെടുന്ന സ്ഥലങ്ങളെക്കുറിച്ചുള്ള വിവരങ്ങൾ ഉടൻ തന്നെ വാർഡ് മെമ്പറെ അറിയിക്കേണ്ടതാണ്.
• നായകളെ പിടികൂടുന്ന സംഘത്തിന് കൃത്യമായ ലൊക്കേഷൻ ലഭ്യമാക്കുന്നതിനായി പൊതുജനങ്ങൾ ഈ അവസരം ഉപയോഗപ്പെടുത്തണം.
തെരുവുനായ ശല്യം കുറയ്ക്കുന്നതിനും പേവിഷബാധ തടയുന്നതിനും പഞ്ചായത്ത് നടത്തുന്ന ഈ പ്രവർത്തനങ്ങളുമായി എല്ലാവരും സഹകരിക്കണമെന്ന് ഗ്രാമപഞ്ചായത്ത് ഭരണസമിതി അറിയിച്ചു.
