കൊല്ലം: തേവലക്കര ബോയ്സ് സ്കൂളില് വിദ്യാര്ത്ഥി ഷോക്കേറ്റ് മരിച്ച സംഭവത്തില് സ്കൂളിലെ പ്രധാന അധ്യാപികയെ സസ്പെന്ഡ് ചെയ്യും. പൊതു വിദ്യാഭ്യാസ ഡയറക്ടറുടെ റിപ്പോര്ട്ടിന്റെ അടിസ്ഥാനത്തിലാണ് നടപടി.വിവിധ വകുപ്പുകളുടെ നേതൃത്വത്തില് സ്കൂളില് ഇന്നും പരിശോധന നടത്തും.വിദ്യാര്ത്ഥിയുടെ മരണത്തില് പ്രതിഷേധിച്ച് കെഎസ്യു ഇന്ന് കൊല്ലം ജില്ലയില് പഠിപ്പു മുടക്കും.സ്കൂളിലേക്ക് ഇന്ന് വിവിധ സംഘടനകള് പ്രതിഷേധ മാര്ച്ച് നടത്തും. മരിച്ച എട്ടാംക്ലാസുകാരന് മിഥുന്റെ സംസ്കരാം നാളെയാണ്.
ഇന്നലെ രാവിലെയാണ് ദാരുണ സംഭവം നടന്നത്. കളിക്കുന്നതിനിടെ സൈക്കിള് ഷെഡിന് മുകളിലേക്ക് വീണ ചെരുപ്പെടുക്കാന് ശ്രമിക്കുമ്പോഴാണ് മിഥുന് ഷോക്കേറ്റത്. കാല് തെന്നിയ മിഥുന് താഴ്ന്നുകിടന്ന വൈദ്യുതി ലൈനില് പിടിച്ചപ്പോഴാണ് അപകടം.പോസ്റ്റുമോര്ട്ടത്തിന് ശേഷം മൃതദേഹം ശാസ്താംകോട്ട തലൂക്ക് ആശുപത്രിയിലേക്ക് മൃതദേഹം മാറ്റി. വിദേശത്തുള്ള അമ്മയെ മിഥുന്റെ മരണവിവരം അറിയിച്ചു. അപകടകരമായ നിലയില് സ്കൂള് കെട്ടിടത്തിന് മുകളിലൂടെ കടന്നുപോയ വൈദ്യുതിലൈന് വിഛേദിച്ചു.
