കോഴിക്കോട്: കായികപ്രേമികൾ ആവേശത്തോടെ കാത്തിരിക്കുന്ന സൂപ്പർ ലീഗ് കേരളയുടെ ആദ്യ സെമി ഫൈനൽ പോരാട്ടം നാളെ നടക്കും. കോഴിക്കോട് കോർപ്പറേഷൻ സ്റ്റേഡിയത്തിൽ ഞായറാഴ്ച രാത്രി 7.30-നാണ് മത്സരം ആരംഭിക്കുന്നത്. സ്വന്തം തട്ടകത്തിൽ ഇറങ്ങുന്ന കാലിക്കറ്റ് എഫ്സിയും കരുത്തരായ കണ്ണൂർ വാരിയേഴ്സും തമ്മിലാണ് ആദ്യ സെമിയിൽ ഏറ്റുമുട്ടുന്നത്.
നേരത്തെ ഡിസംബർ ഏഴിന് തൃശൂരിൽ വെച്ചാണ് സെമി മത്സരങ്ങൾ തുടങ്ങാൻ നിശ്ചയിച്ചിരുന്നത്. എന്നാൽ ഉപതിരഞ്ഞെടുപ്പ് ഡ്യൂട്ടിയുമായി ബന്ധപ്പെട്ട് ആവശ്യത്തിന് പോലീസ് ഉദ്യോഗസ്ഥരെ വിട്ടുനൽകാൻ കഴിയില്ലെന്ന് അധികൃതർ അറിയിച്ചതിനെ തുടർന്ന് മത്സരങ്ങൾ മാറ്റിവെക്കുകയായിരുന്നു. സുരക്ഷാ ക്രമീകരണങ്ങൾക്കായി ആൾക്ഷാമമുണ്ടെന്ന് പോലീസ് റിപ്പോർട്ട് ചെയ്ത സാഹചര്യത്തിലാണ് സംഘാടകർ പുതിയ തീയതി പ്രഖ്യാപിച്ചത്. മാറ്റിവെച്ച ആവേശപ്പോരാട്ടത്തിന് കോഴിക്കോട് വേദിയാകുമ്പോൾ വലിയ ജനപങ്കാളിത്തമാണ് സംഘാടകർ പ്രതീക്ഷിക്കുന്നത്.
