ന്യൂഡല്ഹി: കമല്ഹാസന് ചിത്രമായ തഗ് ലൈഫിന്റെ റിലീസ് വിലക്കിയ കേസില് കര്ണാടക സര്ക്കാരിനെതിരെ സുപ്രീം കോടതി. ചിത്രം നിയമപ്രകാരം റിലീസ് ചെയ്യണമെന്നാണ് സുപ്രീം കോടതിയുടെ ആവശ്യം. റിലീസ് സംബന്ധിച്ച തീരുമാനം അറിയിക്കാന് കര്ണാടക സര്ക്കാരിന് നോട്ടിസ് അയച്ച കോടതി, ഒരു ദിവസത്തെ സമയവും നല്കി. കമല്ഹാസന്റെ വിവാദ പരാമര്ശങ്ങളുടെ പേരില് ചിത്രത്തിന്റെ റിലീസ് തടയുമെന്ന് ഭീഷണിപ്പെടുത്തിയ ഗ്രൂപ്പുകളെ വിമര്ശിച്ചായിരുന്നു സുപ്രീം കോടതിയുടെ തീരുമാനം. പ്രശ്നം പരിഹരിക്കാന് നിര്മാതാവ് ക്ഷമാപണം നടത്തണമെന്ന ഹൈക്കോടതി നിര്ദേശത്തെയും സുപ്രീം കോടതി ചോദ്യം ചെയ്തു.
ആള്ക്കൂട്ട ഭീഷണികള്ക്ക് നിയമവാഴ്ചയെ ബന്ദിയാക്കാന് കഴിയില്ലെന്നും, തിയറ്ററുകളില് എന്ത് പ്രദര്ശിപ്പിക്കണമെന്ന് തീരുമാനിക്കാന് ഗുണ്ടകളുടെ കൂട്ടങ്ങളെ അനുവദിക്കാന് കഴിയില്ലെന്നും കോടതി ചൂണ്ടിക്കാട്ടി. ആരെങ്കിലും ഒരു പ്രസ്താവന നടത്തിയിട്ടുണ്ടെങ്കില്, നിങ്ങള്ക്ക് മറ്റൊരു പ്രസ്താവനയിലൂടെ അതിനെ നേരിടാം. തിയറ്ററുകള് കത്തിക്കുമെന്ന് ഭീഷണിപ്പെടുത്താന് നിങ്ങള്ക്ക് കഴിയില്ലെന്നും സുപ്രീം കോടതി പറഞ്ഞു.
കര്ണാടകയിലെ ജനങ്ങള്ക്ക് കമല്ഹാസന്റെ പ്രസ്താവനയോട് വിയോജിക്കാന് സ്വാതന്ത്ര്യമുണ്ടെങ്കിലും മൗലികാവകാശങ്ങള് സംരക്ഷിക്കപ്പെടേണ്ടതുണ്ട്. ക്ഷമാപണം നടത്തണമെന്ന് ഹൈക്കോടതി എന്തിനാണ് പറയുന്നത്. അത് ഹൈക്കോടതിയുടെ റോളല്ലെന്നും സുപ്രീം കോടതി പറഞ്ഞു. ഒരു സിനിമയ്ക്ക് സെന്ട്രല് ബോര്ഡ് ഓഫ് ഫിലിം സര്ട്ടിഫിക്കേഷന് അനുമതി നല്കിക്കഴിഞ്ഞാല്, അത് റിലീസ് ചെയ്യാന് അനുവദിക്കണം. ആളുകള്ക്ക് അത് കാണേണ്ടെന്ന് തീരുമാനിക്കാം. എന്നാല് ഒരു സിനിമ റിലീസ് ചെയ്യണോ വേണ്ടയോ എന്ന് ഭിഷണിയിലൂടെ തീരുമാനിക്കുന്നത് അനുവദിക്കാന് കഴിയില്ല. സുപ്രീം കോടതി നിയമവാഴ്ചയുടെ സംരക്ഷകരാണ്. അതിനാണ് സുപ്രീം കോടതി നിലക്കൊള്ളുന്നതെന്നും കോടതി വ്യക്തമാക്കി.
