വാഷിംഗ്‌ടൺ: ഇറാനിലെ ഊർജകേന്ദ്രങ്ങളിലേക്കുള്ള ആക്രമണം താൽക്കാലികമായി നിർത്തിവെക്കാൻ അമേരിക്കൻ പ്രസിഡന്റ് ഡൊണാൾഡ് ട്രംപ് ഉത്തരവിട്ടു. പത്ത് ദിവസത്തേക്ക് ആക്രമണം നിർത്തിവെയ്ക്കാനാണ് തീരുമാനം. ഇറാൻ സർക്കാരിന്റെ അഭ്യർത്ഥന പരിഗണിച്ചാണ് ഈ നീക്കമെന്നും ചർച്ചകളിൽ പുരോഗതി ഉണ്ടാകുന്നുവെന്നും ട്രംപ് അറിയിച്ചു. ട്രൂത്ത് സോഷ്യൽ പ്ലാറ്റ്‌ഫോമിലൂടെയാണ് അദ്ദേഹം പ്രഖ്യാപനം നടത്തിയത്. സമാധാനകരാർ അംഗീകരിക്കാത്ത പക്ഷം ആക്രമണം തുടരുമെന്ന് അമേരിക്ക നേരത്തെ മുന്നറിയിപ്പ് നൽകിയിരുന്നു. എന്നാൽ ഇപ്പോഴത്തെ പത്ത് ദിവസത്തെ ഇടവേള മിഡിൽ ഈസ്റ്റിൽ സമാധാന ശ്രമങ്ങൾക്ക് സഹായകരമാകുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.

വാഷിങ്ടൺ: പശ്ചിമേഷ്യയിലെ യുദ്ധം അവസാനിപ്പിക്കാൻ ഇറാനോട് 15 നിർദേശങ്ങൾ മുന്നോട്ടുവെച്ച് അമേരിക്ക. ഇറാന്റെ ആണവപദ്ധതിയിൽ കർശന നിയന്ത്രണം ഏർപ്പെടുത്തുകയും ഹോർമുസ് കടലിടുക്ക് വീണ്ടും തുറക്കുകയും ചെയ്യണമെന്നതാണ് പ്രധാന നിർദേശങ്ങൾ. ചർച്ചകൾക്ക് വഴിയൊരുക്കാൻ ഒരു മാസത്തെ വെടിനിർത്തലിനും യുഎസ് താത്പര്യം പ്രകടിപ്പിച്ചിട്ടുണ്ട്. എന്നാൽ ഈ നിർദേശങ്ങൾ ഇറാൻ അംഗീകരിക്കാൻ സാധ്യത കുറവാണെന്നാണ് വിലയിരുത്തൽ. ഇറാന്റെ ആണവശേഷിയും ബന്ധപ്പെട്ട സൈനിക സംവിധാനങ്ങളും നിയന്ത്രിക്കണമെന്ന നിർദേശവും അമേരിക്ക മുന്നോട്ടുവെച്ചിട്ടുണ്ട്. ഇതിന് പകരമായി ഇറാന്മേൽ ഏർപ്പെടുത്തിയിരിക്കുന്ന ഉപരോധം ഭാഗികമായി പിൻവലിക്കാമെന്നും യുഎസ് പറയുന്നു. […]