കോഴിക്കോട്: വടകരയിൽ യുവാവിനെ കാണാതായ സംഭവം ലോൺ ആപ്പ് ജീവനക്കാരുടെ ഭീഷണിയെ തുടർന്നാകാമെന്ന സംശയവുമായി കുടുംബം രംഗത്തെത്തി. വടകര ആയഞ്ചേരി സ്വദേശി വാളാഞ്ഞിയിൽ വിഷ്ണു പ്രകാശിനെയാണ് ഈ മാസം 13 മുതൽ കാണാതായത്. ബാങ്കിലേക്ക് പോകുന്നു എന്ന് പറഞ്ഞാണ് യുവാവ് വീട്ടിൽ നിന്ന് പുറപ്പെട്ടതെന്ന് ബന്ധുക്കൾ പറയുന്നു.

വിഷ്ണു ഒരു ലോൺ ആപ്പിൽ നിന്ന് 10,000 രൂപ വായ്പ എടുത്തിരുന്നതായി കുടുംബം വ്യക്തമാക്കുന്നു. ഈ വായ്പയുടെ തിരിച്ചടവ് മുടങ്ങിയതിന് പിന്നാലെ നിരന്തരം ഭീഷണികൾ ഉണ്ടായിരുന്നുവെന്നും, മോർഫ് ചെയ്ത ചിത്രങ്ങൾ അയച്ച് സമ്മർദ്ദം ചെലുത്തിയിരുന്നുവെന്നും വടകര പൊലീസിൽ നൽകിയ പരാതിയിൽ പറയുന്നു.

സംഭവത്തിൽ 14-ാം തീയതി തന്നെ പൊലീസിൽ പരാതി നൽകിയിരുന്നുവെങ്കിലും യുവാവിനെ ഇതുവരെ കണ്ടെത്താനായിട്ടില്ല. വിഷ്ണുവിന്റെ മൊബൈൽ ഫോൺ സ്വിച്ച് ഓഫ് ആണെന്നും വിവരമുണ്ട്. തുടർന്ന് ബന്ധുക്കൾ റൂറൽ ജില്ലാ സൈബർ സെല്ലിലും പരാതി നൽകി അന്വേഷണം ശക്തമാക്കിയിട്ടുണ്ട്.