പത്തനംതിട്ട: കോന്നി അടവി ഇക്കോ ടൂറിസം കേന്ദ്രത്തിലെ തൊഴിലാളി സമരം അവസാനിച്ചു. 60 വയസ്സു കഴിഞ്ഞ തൊഴിലാളികളെ ഉള്പ്പെടെ ഒഴിവാക്കാനുള്ള വനംവകുപ്പ് നീക്കത്തിനെതിരെയായിരുന്നു സമരം ആരംഭിച്ചിരുന്നത്. എംഎല്എയും ഡിഎഫ്ഒയും ട്രേഡ് യൂണിയനുകളുമായി നടത്തിയ ചര്ച്ചയില് ആണ് സമരം അവസാനിച്ചത്. പ്രായപരിധി പ്രശ്നം പരിഹരിക്കുന്നതിനായി വനം വകുപ്പ് മന്ത്രിയുടെ സാന്നിധ്യത്തില് ഉന്നതതല യോഗം ചേരും. യോഗം ചേരുന്നത് വരെ തൊഴിലാളികള്ക്ക് പ്രായപരിധി പ്രശ്നം ഉണ്ടാകില്ല. ഉന്നതതല യോഗത്തില് തൊഴിലാളികളുടെ ആനുകൂല്യങ്ങളും ചര്ച്ചയാകും.
ജില്ലയിലെ പ്രധാന ടൂറിസം മേഖലകളില് ഒന്നാണ് അടവി ഇക്കോ ടൂറിസം കേന്ദ്രം. ആനക്കൂട് അപകടത്തിന് ശേഷമാണ് 60 ത് കഴിഞ്ഞ തുഴച്ചില് തൊഴിലാളികളെ ഉള്പ്പെടെ ഒഴിവാക്കാനുള്ള തീരുമാനം വന്നത്. പിന്നാലെ ആനുകൂല്യങ്ങള് നല്കാതെയുള്ള പിരിച്ചുവിടലിനെതിരെ ദിവസവേതന തൊഴിലാളികള് സമരം ആരംഭിച്ചിരുന്നു. തൊഴിലാളികള്ക്ക് പിന്തുണ പ്രഖ്യാപിച്ചും വനം വകുപ്പിന്റെ നിലപാടിനെ ചോദ്യം ചെയ്തും സിഐടിയുവും രംഗത്തെത്തി. അടവി ഇക്കോ ടൂറിസം കേന്ദ്രത്തില് ആകെ 41 താത്ക്കാലിക ജീവനക്കാരാണ് ഉള്ളത്.
