മലപ്പുറം: തിയേറ്ററിലെ ജനറേറ്ററിൽനിന്ന് വിലപിടിപ്പുള്ള ചെമ്പുപട്ട മുറിച്ചെടുത്ത് മോഷണം നടത്തിയ കേസിൽ തമിഴ്നാട് സ്വദേശി അറസ്റ്റിൽ. നാഗപട്ടണം സ്വദേശി കാളിദാസൻ (50) ആണ് തിരൂർ പൊലീസിന്റെ പിടിയിലായത്.

കഴിഞ്ഞ മാസം 23നായിരുന്നു മോഷണം നടന്നത്. തിരൂർ പുങ്ങാട്ടുകുളം തുഞ്ചൻ സ്മാരക റോഡിലെ ഖയ്യാം തിയേറ്ററിലെ ജനറേറ്ററിൽ ഘടിപ്പിച്ചിരുന്ന ചെമ്പുപട്ടയാണ് പ്രതി മുറിച്ചെടുത്ത് കടത്തിയത്. ജനറേറ്ററിന്റെ പ്രവർത്തനത്തിന് പ്രധാനമായ ഭാഗം മോഷണം പോയതോടെ ഉപകരണങ്ങൾക്ക് കേടുപാടുകളും സംഭവിച്ചു.

മോഷണവിവരം ശ്രദ്ധയിൽപ്പെട്ടതിനെ തുടർന്ന് തിയേറ്റർ അധികൃതർ പൊലീസിൽ പരാതി നൽകി. തുടർന്ന് തിരൂർ പൊലീസ് കേസെടുത്ത് അന്വേഷണം ആരംഭിച്ചു. സ്ഥലത്തും പരിസരങ്ങളിലും പരിശോധന നടത്തിയ പൊലീസ് വിവിധ വിവരങ്ങൾ ശേഖരിച്ചാണ് പ്രതിയെ കണ്ടെത്തിയത്.

തിരൂർ സി ഐ ജലീൽ കറുത്തേടത്തിന്റെ നേതൃത്വത്തിലുള്ള സംഘമാണ് കാളിദാസനെ അറസ്റ്റ് ചെയ്തത്. പ്രതിയുമായി ഖയ്യാം തിയേറ്ററിലെത്തി തെളിവെടുപ്പും നടത്തി. മോഷ്ടിച്ച ചെമ്പുപട്ട എവിടേക്ക് മാറ്റിയെന്നും വിൽപ്പന നടത്തിയിട്ടുണ്ടോയെന്നും പൊലീസ് അന്വേഷിച്ചുവരികയാണ്. സംഭവത്തിൽ കൂടുതൽ പേർക്ക് പങ്കുണ്ടോയെന്നും പരിശോധിക്കുന്നുണ്ട്.