ന്യൂഡൽഹി: ശബരിമല യുവതി പ്രവേശനവുമായി ബന്ധപ്പെട്ട കേസിൽ ഭരണഘടന ബെഞ്ചിന് മുന്നിൽ അനുകൂല വാദം ഇന്ന് മുതൽ ആരംഭിക്കും. മുതിർന്ന അഭിഭാഷക ഇന്ദിര ജയ്സിങ് ആണ് യുവതി പ്രവേശനത്തെ പിന്തുണച്ച് ആദ്യം വാദിക്കുക.
യുവതി പ്രവേശന വിധിയെ എതിർക്കുന്നവരുടെ വാദം ഒൻപത് ദിവസങ്ങൾക്ക് ശേഷം ഇന്നലെ പൂർത്തിയായി. ഇതോടെ പുനപരിശോധന ഹർജിയെ എതിർക്കുന്നവരുടെ വാദം തുടങ്ങുകയാണ്. എട്ട് ദിവസത്തിനുള്ളിൽ വാദം പൂർത്തിയാക്കണമെന്നായിരുന്നു ചീഫ് ജസ്റ്റിസിന്റെ നിർദേശം, എന്നാൽ കേസിലെ സങ്കീർണ്ണമായ നിയമവിഷയങ്ങൾ കാരണം സമയം നീണ്ടു.
ബിന്ദു അമ്മിണി, കനക ദുർഗ എന്നിവർക്കായി മുൻപ് ഹാജരായിരുന്ന ഇന്ദിര ജയ്സിങ് ആണ് അനുകൂല വാദം നയിക്കുന്നത്. 15-ലേറെ കക്ഷികൾ യുവതി പ്രവേശനത്തെ പിന്തുണച്ച് എഴുത്തുപരമായ വാദങ്ങൾ സമർപ്പിച്ചിട്ടുണ്ട്. കഴിഞ്ഞ ദിവസങ്ങളിലെ വാദത്തിനിടെ മതാചാരങ്ങൾ, വിശ്വാസം, സ്ത്രീകളുടെ അവകാശങ്ങൾ എന്നിവയെക്കുറിച്ച് സുപ്രീംകോടതി ചില പ്രധാന നിരീക്ഷണങ്ങൾ നടത്തിയിരുന്നു. ഇനി നടക്കുന്ന വാദങ്ങളിലും ഈ വിഷയങ്ങൾക്കാണ് കൂടുതൽ പ്രാധാന്യം.
ഇന്നത്തെ വാദം ആരംഭിച്ചാലും ഇത് പൂർത്തിയാകാൻ കുറച്ച് ദിവസങ്ങൾ കൂടി വേണ്ടിവരും. നാളെ സാധാരണ കേസുകൾ പരിഗണിക്കുന്നതിനാൽ അടുത്ത വാദം മെയ് 5-നാകും നടക്കുക. കേരള നിയമസഭാ തിരഞ്ഞെടുപ്പ് ഫലം പ്രഖ്യാപിച്ചതിന് ശേഷമേ സംസ്ഥാന സർക്കാരിന്റെ വാദം നടക്കാൻ സാധ്യതയുള്ളു.
