മലപ്പുറം: കിഴിശ്ശേരി യിൽ10 ഗ്രാം ഹെറോയിനുമായി അസം സ്വദേശികളായ രണ്ട് അതിഥിത്തൊഴിലാളികൾ പിടിയിൽ. അസം നാഗോൺ സ്വദേശികളായ ദിൽദാർ ഹുസൈൻ (27), അജ്ബുർ റഹ്‌മാൻ (28) എന്നിവരാണ് പോലീസിന്റെ പിടിയിലായത്. കിഴിശ്ശേരി ആലിൻചുവട്ടിലെ വാടകവീട്ടിൽ നടത്തിയ പരിശോധനയിലാണ് ഇരുവരും പിടിയിലായത്.

കൊണ്ടോട്ടിയിലും പരിസരപ്രദേശങ്ങളും കേന്ദ്രീകരിച്ച് വിദ്യാർഥികൾക്കും അതിഥിത്തൊഴിലാളികൾക്കും ലഹരിമരുന്ന് വിൽപ്പന നടത്തിവരികയായിരുന്നു ഇരുവരുമെന്ന് പോലീസ് പറഞ്ഞു. ഇവരിൽനിന്ന് ലഹരിക്കടത്തുസംഘത്തിലെ കണ്ണികളെക്കുറിച്ച് സൂചന ലഭിച്ചിട്ടുണ്ട്.ജില്ലാ പോലീസ് മേധാവിക്ക് ലഭിച്ച രഹസ്യവിവരത്തിന്റെ അടിസ്ഥാനത്തിൽ എഎസ്‌പി, ഇൻസ്പെക്ട‌ർ, എസ്ഐ എന്നിവരുടെ നേതൃത്വത്തിൽ കൊണ്ടോട്ടി ഡാൻസാഫ് സംഘമാണ് ഹെറോയിൻ പിടികൂടിയത്.