ദ്രാവിഡ രാഷ്ട്രീയത്തിന് എന്നും വെള്ളിത്തിരയിലെ രംഗങ്ങളേക്കാൾ നാടകീയതയും സിനിമാറ്റിക് സവിശേഷതകളുമുണ്ട്. സിനിമയെന്നപോലെ തന്നെ രാഷ്ട്രീയ നേതാക്കളുടെ അറസ്റ്റുകളും അറസ്റ്റുമായി ബന്ധപ്പെട്ടുണ്ടാകുന്ന തീയറ്ററിക്സുകളും തമിഴകത്ത് പുതിയ സംഭവമല്ല. ചലച്ചിത്രതാരം തൃഷയ്ക്കെതിരായ ദ്വയാർത്ഥ പ്രയോഗത്തിന്റെ പേരിൽ ഡി.എം.കെ നേതാവും പ്രതിപക്ഷ നേതാവുമായ ഉദയനിധി സ്റ്റാലിനെതിരെ കേസ് രജിസ്റ്റർ ചെയ്തതും, തുടർന്ന് പോലീസ് അദ്ദേഹത്തെ കസ്റ്റഡിയിലെടുത്ത രീതിയും ഈ വിഷയത്തെ വീണ്ടും തമിഴ് രാഷ്ട്രീയത്തിലെ ചൂടേറിയ ചർച്ചയാക്കി മാറ്റിയിരിക്കുകയാണ്. ഉദയനിധിയെ കസ്റ്റഡിയിലെടുക്കാനായി ഡി.എം.കെ പ്രവർത്തകരെ അടിച്ചോടിച്ച് പോലീസ് കാണിച്ച മാസ് ആക്ഷൻ സിനിമാ സ്റ്റൈൽ തന്ത്രങ്ങൾ, ദ്രാവിഡ രാഷ്ട്രീയത്തിൽ മുൻപും അരങ്ങേറിയിട്ടുള്ള അത്തരം നാടകീയ രംഗങ്ങളുടെ തുടർച്ച മാത്രമാണ്.

എന്നാൽ, അറസ്റ്റ് ചെയ്ത ഉദയനിധിയെ ചോദ്യം ചെയ്ത് മണിക്കൂറുകൾക്കകം തന്നെ പോലീസ് വിട്ടയയ്ക്കുകയും ചെയ്തു. സ്ത്രീകളുടെ താൽപ്പര്യം സംരക്ഷിക്കുക എന്ന ഉദ്ദേശ്യം മാത്രമേ സർക്കാരിനുള്ളൂ എന്നും അതൊന്ന് പ്രതിപക്ഷത്തെ ഓർമിപ്പിക്കുകയാണ് തങ്ങൾ ലക്ഷ്യമിട്ടതെന്നും വിജയ് സർക്കാർ തങ്ങളുടെ നിലപാട് വ്യക്തമായി കോടതിയെ അറിയിച്ചിട്ടുണ്ട്. ഇക്കഴിഞ്ഞ തെരഞ്ഞെടുപ്പിന് ശേഷം രാഷ്ട്രീയമായി തളർന്നു കിടന്നിരുന്ന ഡി.എം.കെയെ സംബന്ധിച്ച് പുതിയൊരു ഉണർവ് നൽകാൻ ഈ സംഭവം സഹായിക്കുമെന്ന കണക്കുകൂട്ടലിലാണ് ഒരു വിഭാഗം നേതാക്കൾ. കാവേരി നദീജല തർക്കവുമായി ബന്ധപ്പെട്ട് ഡി.എം.കെ സംഘടിപ്പിച്ച പ്രതിഷേധ പരിപാടിക്കിടെയായിരുന്നു ഉദയനിധി സ്റ്റാലിൻ ഈ വിവാദ പരാമർശം നടത്തിയത്. അതേസമയം, വിഷയത്തിൽ കോൺഗ്രസ് അടക്കമുള്ള ഘടകകക്ഷികൾ ഉദയനിധിയെ തള്ളി രംഗത്തെത്തിയതോടെ ഡി.എം.കെ ഇപ്പോൾ വലിയൊരു അളവിൽ ഒറ്റപ്പെട്ട അവസ്ഥയിലുമാണ്.

ഈ സംഭവവികാസങ്ങൾ പഴയകാല ചരിത്രത്തിലേക്ക് നോക്കുമ്പോൾ പലരുടെയും മനസ്സിലേക്ക് ഓടിയെത്തുന്നത് ഉദയനിധിയുടെ മുത്തച്ഛനും മുൻ മുഖ്യമന്ത്രിയുമായ എം. കരുണാനിധിയെ പണ്ട് മുൻ മുഖ്യമന്ത്രി ജയലളിതയുടെ ഭരണകാലത്ത് പോലീസ് വീട്ടിൽ നിന്ന് വലിച്ചിഴച്ചുകൊണ്ട് അറസ്റ്റ് ചെയ്തുകൊണ്ടുപോയ ആ ഭീകര ദൃശ്യങ്ങളാണ്. ദ്രാവിഡ രാഷ്ട്രീയത്തിൽ പ്രമുഖ നേതാക്കളുടെ അറസ്റ്റുകൾ കേവലം ഒരു നിയമനിർവ്വഹണ നടപടി എന്നതിലുപരി വലിയ രാഷ്ട്രീയ ഭൂകമ്പങ്ങൾക്കാണ് എപ്പോഴും വഴിതെളിച്ചിട്ടുള്ളത്. തമിഴ്നാട്ടിലെ ഭരണമാറ്റങ്ങൾക്കൊപ്പം ആവർത്തിക്കപ്പെടുന്ന രാഷ്ട്രീയ പ്രതികാര നടപടികളും, കേന്ദ്ര അന്വേഷണ ഏജൻസികളുടെ ഇടപെടലുകളും ഇതിൽ നിർണ്ണായക പങ്കുവഹിച്ചിട്ടുണ്ട്. അതുകൊണ്ടുതന്നെ എം. കരുണാനിധി, ജയലളിത, മുൻ കേന്ദ്രമന്ത്രിമാരായ മുരശൊലി മാരൻ, പി. ചിദംബരം തുടങ്ങിയ പ്രമുഖരുടെ പഴയകാല അറസ്റ്റുകൾ ഇപ്പോൾ വീണ്ടും ചർച്ചയായി മാറുകയാണ്.

ഇന്ത്യൻ രാഷ്ട്രീയ ചരിത്രത്തിലെ തന്നെ ഏറ്റവും നാടകീയവും വിവാദപരവുമായ സംഭവങ്ങളിലൊന്നാണ് 2001 ജൂൺ 30-ന് പുലർച്ചെ നടന്ന എം. കരുണാനിധിയുടെയും മുരശൊലി മാരന്റെയും അർദ്ധരാത്രിയിലെ അറസ്റ്റ്. 2001 മേയിൽ നടന്ന തമിഴ്നാട് നിയമസഭാ തിരഞ്ഞെടുപ്പിൽ എ.ഐ.എ.ഡി.എം.കെ വിജയിക്കുകയും ജയലളിത മുഖ്യമന്ത്രിയായി അധികാരമേൽക്കുകയും ചെയ്തതോടെയാണ് പകപോക്കലിന്റെ ഈ സംഭവങ്ങൾക്ക് തുടക്കമായത്. കരുണാനിധിയുടെ മുൻ ഭരണകാലത്ത് ചെന്നൈ നഗരത്തിൽ 10 മിനി ഫ്ലൈഓവറുകൾ നിർമ്മിച്ചതിൽ വൻ ക്രമക്കേട് നടന്നു എന്നും, സംസ്ഥാന ഖജനാവിന് 12 കോടിയുടെ നഷ്ടം വരുത്തിവെച്ചു എന്നതുമായിരുന്നു പ്രധാന ആരോപണം. എന്നാൽ പരാതി ലഭിച്ച് മണിക്കൂറുകൾക്കകം തന്നെ യാതൊരുവിധ പ്രാഥമിക അന്വേഷണവുമില്ലാതെ പോലീസ് അതിവേഗം അറസ്റ്റ് നടപടികളിലേക്ക് കടക്കുകയായിരുന്നു.

ജൂൺ 30-ന് പുലർച്ചെ 1:30-ഓടെ cbcid dig മുഹമ്മദ് അലിയുടെ നേതൃത്വത്തിലുള്ള വൻ പോലീസ് സംഘം മൈലാപ്പൂരിലെ കരുണാനിധിയുടെ വസതിയിൽ അതിക്രമിച്ചു കയറി. പുറത്തുനിന്നുള്ള ആശയവിനിമയം തടയാനായി വീടുകളിലെ ടെലിഫോൺ ലൈനുകൾ എല്ലാം തന്നെ പോലീസ് വിച്ഛേദിച്ചിരുന്നു. 77 വയസ്സുള്ള കരുണാനിധി കിടപ്പുമുറിയിൽ ഉറങ്ങിക്കിടക്കുമ്പോഴാണ് പോലീസ് വാതിൽ ബലമായി തുറന്ന് അകത്തുകയറി വസ്ത്രം മാറാൻ ആവശ്യപ്പെട്ടത്. അതിനുശേഷം താഴേക്ക് കൊണ്ടുവരുന്നതിനിടെ പോലീസുകാർ അദ്ദേഹത്തെ തള്ളിയിടുകയും ബലമായി വലിച്ചിഴയ്ക്കുകയും ചെയ്തു. ശരിയായ വസ്ത്രം ധരിക്കാൻ പോലും അനുവദിക്കാതെ ക്രൂരമായി പെരുമാറിയ പോലീസിനോട് കരുണാനിധി പ്രതിഷേധിക്കുകയും “എന്നെ കൊല്ലാൻ കൊണ്ടുപോകുന്നേ” എന്ന് ഉറക്കെ നിലവിളിക്കുകയും ചെയ്തത് അന്ന് വലിയ നടുക്കമാണ് സൃഷ്ടിച്ചത്.

അതോടൊപ്പം തന്നെ സ്ഥലത്തെത്തിയ കേന്ദ്രമന്ത്രി മുരശൊലി മാരനെ ഒരു ചാക്കുപോലെ വലിച്ചെറിഞ്ഞാണ് പോലീസ് വാഹനത്തിൽ കയറ്റിയത്. ശാരീരിക അസ്വസ്ഥതകൾ അനുഭവപ്പെട്ട അദ്ദേഹത്തെ ഉടൻ തന്നെ അപ്പോളോ ആശുപത്രിയിൽ പ്രവേശിപ്പിക്കേണ്ടി വന്നു. വിവരമറിഞ്ഞ് സ്ഥലത്തെത്തിയ മറ്റൊരു കേന്ദ്രമന്ത്രിയായ ടി.ആർ. ബാലുവിനെയും പോലീസ് കയ്യേറ്റം ചെയ്യുകയും അറസ്റ്റ് രേഖപ്പെടുത്തുകയും ചെയ്തു.

യഥാർത്ഥത്തിൽ കരുണാനിധിയുടെ അറസ്റ്റിലേക്ക് വഴിതെളിച്ച ഈ വൈരാഗ്യ രാഷ്ട്രീയത്തിന് തുടക്കമിട്ടത് 1996 ഡിസംബറിലെ ജയലളിതയുടെ അറസ്റ്റായിരുന്നു. 1991-96 കാലഘട്ടത്തിൽ ഗ്രാമപഞ്ചായത്തുകളിലേക്ക് കളർ ടെലിവിഷൻ സെറ്റുകൾ വാങ്ങിയതിൽ 10 കോടി രൂപയുടെ അഴിമതി നടത്തിയെന്നാരോപിച്ച് അന്ന് ഡി.എം.കെ സർക്കാരാണ് ജയലളിതയ്ക്കെതിരെ കേസെടുത്തത്. ഇതോടൊപ്പം 66.65 കോടി രൂപയുടെ അവിഹിത സ്വത്ത് സമ്പാദന കേസും അവർക്കെതിരെ രജിസ്റ്റർ ചെയ്യപ്പെട്ടു. തുടർന്ന് 1996 ഡിസംബർ 7-ന് മുൻകൂർ ജാമ്യം തള്ളിയതോടെ, ചെന്നൈ പോയസ് ഗാർഡനിലുള്ള വസതിക്ക് ചുറ്റും തടിച്ചുകൂടിയ 2,500-ഓളം പ്രവർത്തകരുടെ കടുത്ത പ്രതിഷേധം മറികടന്ന് പോലീസ് ജയലളിതയെയും വി.കെ. ശശികലയെയും അറസ്റ്റ് ചെയ്തു. ചെന്നൈ സെൻട്രൽ ജയിലിൽ അടയ്ക്കപ്പെട്ട അവർക്ക് 1997 ജനുവരി 3-നാണ് ജാമ്യം ലഭിച്ചത്. എന്നാൽ പിന്നീട് ഈ കേസിൽ 2000 മെയ് 30-ന് പ്രത്യേക കോടതി ജയലളിതയെയും ശശികലയെയും കുറ്റവിമുക്തരാക്കുകയാണുണ്ടായത്.

ഇവയ്ക്ക് സമാനമായി ദേശീയതലത്തിൽ തന്നെ വൻ രാഷ്ട്രീയ കോലാഹലങ്ങൾക്ക് വഴിവെച്ച ഒന്നായിരുന്നു 2019 ഓഗസ്റ്റ് 21-ന് മുൻ കേന്ദ്രമന്ത്രി പി. ചിദംബരത്തിന് നേരിടേണ്ടിവന്ന അറസ്റ്റ്. ഐ.എൻ.എക്സ് (INX) മീഡിയ കമ്പനിക്ക് വിദേശ നിക്ഷേപ പ്രോത്സാഹന ബോർഡിന്റെ അനുമതി നൽകിയതിൽ വലിയ സാമ്പത്തിക ക്രമക്കേട് ആരോപിച്ചാണ് സി.ബി.ഐയും ഇ.ഡിയും കേസ് എടുത്തത്. ഡൽഹി ഹൈക്കോടതി മുൻകൂർ ജാമ്യം തള്ളിയതോടെ എ.ഐ.സി.സി ആസ്ഥാനത്ത് മാധ്യമങ്ങളെ കണ്ട ശേഷം ജോർ ബാഗിലെ വസതിയിലെത്തിയ ചിദംബരത്തെ അറസ്റ്റ് ചെയ്യാനായി സി.ബി.ഐ ഉദ്യോഗസ്ഥർ വീടിന്റെ മതിൽ ചാടിക്കടന്നത് വലിയ രീതിയിൽ വാർത്താപ്രാധാന്യം നേടിയിരുന്നു.

കൂടാതെ, 2002-ൽ എം.ഡി.എം.കെ (MDMK) നേതാവായ വൈകോയെ എൽ.ടി.ടി.ഇയെ (LTTE) പരസ്യമായി പിന്തുണച്ച് പ്രസംഗിച്ചതിന്റെ പേരിൽ അന്നത്തെ ജയലളിത സർക്കാർ തീവ്രവാദ വിരുദ്ധ നിയമമായ ‘പോട്ട’ (POTA) ചുമത്തി അറസ്റ്റ് ചെയ്തിരുന്നു. ഏകദേശം 19 മാസത്തോളമാണ് വൈകോയ്ക്ക് ജയിലിൽ കഴിയേണ്ടി വന്നത്. തമിഴ്നാട്ടിലെ രാഷ്ട്രീയ പകപോക്കലിന്റെ മറ്റൊരു വ്യക്തമായ ഉദാഹരണമായിരുന്നു ഈ സംഭവം.

ഉദയനിധിയുടെ അച്ഛനും മുൻ മുഖ്യമന്ത്രിയുമായ എം.കെ. സ്റ്റാലിനും തന്റെ രാഷ്ട്രീയ ജീവിതത്തിൽ പലതവണ ഇത്തരം അറസ്റ്റുകൾ വരിച്ചിട്ടുണ്ട്. 2001-ൽ കരുണാനിധിയുടെ അറസ്റ്റിന് പിന്നാലെ സ്റ്റാലിൻ കോടതിയിൽ നേരിട്ട് കീഴടങ്ങുകയായിരുന്നു. ഇതുകൂടാതെ, എ.ഐ.എ.ഡി.എം.കെ ഭരണകാലത്ത് ജനകീയ സമരങ്ങൾ നയിച്ചതിന്റെ പേരിലും നിയമസഭയ്ക്കുള്ളിലെ പ്രതിഷേധങ്ങളുടെ പേരിലും സ്റ്റാലിനെ പോലീസ് നാടകീയമായി പലതവണ കസ്റ്റഡിയിലെടുത്തിട്ടുണ്ട്.

ദ്രാവിഡ രാഷ്ട്രീയത്തിലെ പുതിയ തലമുറയിലെ പ്രധാന നേതാവും ഡി.എം.കെ പ്രമുഖനുമായ ഉദയനിധി സ്റ്റാലിനും ഇപ്പോൾ ഇത്തരം രാഷ്ട്രീയ അറസ്റ്റ് നാടകങ്ങളുടെ ഭാഗമായി മാറിയിരിക്കുകയാണ്. മുൻപ് പ്രതിപക്ഷത്തായിരുന്നപ്പോഴും പിന്നീട് വിവിധ രാഷ്ട്രീയ വിഷയങ്ങളിലും കേന്ദ്ര-സംസ്ഥാന സർക്കാരുകളുടെ നയങ്ങൾക്കെതിരെ പ്രതിഷേധിച്ചപ്പോഴും ഉദയനിധിയെ പോലീസ് മുൻകരുതലായി തടഞ്ഞുവെക്കുകയും അറസ്റ്റ് ചെയ്യുകയും ചെയ്തിട്ടുണ്ട്. തമിഴ് രാഷ്ട്രീയത്തിൽ രാഷ്ട്രീയ എതിരാളികൾ തമ്മിലുള്ള വാഗ്വാദങ്ങൾ മൂർച്ഛിക്കുമ്പോൾ പോലീസിൽ പരാതി നൽകുന്നതും കേസ് അറസ്റ്റ് ഘട്ടത്തിലേക്ക് കാര്യങ്ങൾ എത്തിക്കുന്നതും എന്നും പതിവുള്ള കാഴ്ചയാണ്. അതിൻ്റെ സ്വാഭാവികമായ തുടർച്ച തന്നെയാണ് ഇപ്പോൾ കാണുന്നതും. ഇനിയുള്ള ദിവസങ്ങളിൽ പ്രതിസന്ധിയിലായിരിക്കുന്ന ഡി.എം.കെ ഈ വിഷയത്തെ രാഷ്ട്രീയമായി എങ്ങനെ കൈകാര്യം ചെയ്യും എന്നതിനെ അപേക്ഷിച്ച് ഇരിക്കും തമിഴക രാഷ്ട്രീയത്തിന്റെ വരുംദിനങ്ങൾ.