ന്യൂഡല്ഹി: രാജ്യത്തെ പൊതുമേഖലാ ബാങ്കുകളുടെ ലയനത്തിന്റെ അടുത്ത ഘട്ടത്തിനുള്ള നടപടികള് ആരംഭിച്ചതായി ധനമന്ത്രി നിര്മലാ സീതാരാമന്.
അതിവേഗത്തില് വികസിച്ചുകൊണ്ടിരിക്കുന്ന സമ്പദ് വ്യവസ്ഥയുടെ വര്ധിച്ചുവരുന്ന ആവശ്യങ്ങള് നിറവേറ്റുന്നതിന് ഇന്ത്യയ്ക്ക് ഒരുപാട് വലിയ ലോകോത്തര നിലവാരമുള്ള ബാങ്കുകള് ആവശ്യമാണെന്ന് ഒരു വ്യാഴാഴ്ച്ച ഒരു പരിപാടിയില് സംസാരിക്കവെ ധനമന്ത്രി വ്യക്തമാക്കി.
”ഈ വിഷയത്തില് എങ്ങനെ മുന്നോട്ട് പോകണമെന്നത് സംബന്ധിച്ച് റിസര്വ് ബാങ്ക് ഓഫ് ഇന്ത്യയുമായും ബാങ്കുകളുമായും സംസാരിക്കേണ്ടതുണ്ട്. കൂടാതെ, വലിയ ബാങ്കുകള് എങ്ങനെ നിര്മിക്കണമെന്ന് അവര് ആര്ബിഐയുമായി ചര്ച്ച ചെയ്യേണ്ടതുമുണ്ട്,’എന്നാണ് വിഷയത്തില് ധനമന്ത്രി നല്കിയ വിശദീകരണം.
ആര്ബിഐയുമായും മറ്റ് ബാങ്കുകളുമായും ചര്ച്ചകള് ഇതിനോടകം തന്നെ ആരംഭിച്ചതായി സീതാരാമന് കൂട്ടിച്ചേര്ത്തു. ”ഇതിനുള്ള നടപടിക്രമങ്ങള് ആരംഭിച്ചു. ഞങ്ങള് ആര്ബിഐയുമായും ബാങ്കുകളുമായും ചര്ച്ച നടത്തിവരികയാണ്. ഇത് ലയനത്തെക്കുറിച്ച് മാത്രമല്ല, ബാങ്കുകള്ക്ക് പ്രവര്ത്തിക്കാനും വളരാനും കഴിയുന്ന ഒരു അന്തരീക്ഷം നമുക്ക് ആവശ്യമുണ്ട്,” കേന്ദ്രമന്ത്രി പറഞ്ഞു.
