തിരുവനന്തപുരം: ഫേസ്ബുക്കിലൂടെ തനിക്കെതിരെ വ്യാജപ്രചാരണം നടത്തിയെന്ന കോൺഗ്രസ് നേതാവ് വി എം സുധീരന്റെ പരാതിയിൽ പൊലീസ് കേസെടുത്തു. മുഹമ്മദ് ഖലീൽ എന്ന ഫേസ്ബുക്ക് അക്കൗണ്ട് ഉടമയ്ക്കെതിരെയാണ് തിരുവനന്തപുരം സിറ്റി സൈബർ ക്രൈം പൊലീസ് കേസെടുത്തത്.

ഭാരതീയ ന്യായ സംഹിതയിലെ 192, 336(3) വകുപ്പുകൾക്കും ഇൻഫർമേഷൻ ടെക്നോളജി ആക്ട് 2000ലെ 66(സി), 120(ഒ) വകുപ്പുകൾ പ്രകാരവുമാണ് കേസ് രജിസ്റ്റർ ചെയ്തിരിക്കുന്നത്. സംഭവത്തിൽ പൊലീസ് അന്വേഷണം ആരംഭിച്ചു.

മുഖ്യമന്ത്രിയെക്കുറിച്ച് താൻ പറയാത്ത അഭിപ്രായങ്ങൾ തന്റെ പേരിൽ പ്രചരിപ്പിച്ചുവെന്ന് ചൂണ്ടിക്കാട്ടിയാണ് വി എം സുധീരൻ പരാതി നൽകിയത്. ഫേസ്ബുക്കിലൂടെ നടത്തിയ പ്രചാരണം ജനങ്ങൾക്കിടയിൽ തെറ്റിദ്ധാരണയും വിദ്വേഷവും പ്രകോപനവും സൃഷ്ടിക്കാനുള്ള ശ്രമമാണെന്നും പരാതിയിൽ ആരോപിച്ചിരുന്നു.

വിഷയത്തിൽ അടിയന്തര അന്വേഷണം നടത്തി ഉത്തരവാദികളായവരെ കണ്ടെത്തണമെന്നും കർശന നടപടി സ്വീകരിക്കണമെന്നും വി എം സുധീരൻ ആവശ്യപ്പെട്ടിരുന്നു. ആഭ്യന്തര വകുപ്പിന് നൽകിയ പരാതിയുടെ അടിസ്ഥാനത്തിലാണ് സൈബർ പൊലീസ് നടപടി സ്വീകരിച്ചത്.