ഡല്ഹി : ഉപരാഷ്ട്രപതി തിരഞ്ഞെടുപ്പ് പ്രക്രിയ നിരീക്ഷിക്കാന് അഡീഷണല് സെക്രട്ടറി റാങ്കിലുള്ള രണ്ട് മുതിര്ന്ന ഉദ്യോഗസ്ഥരെ നിരീക്ഷകരായി നിയമിച്ച് തിരഞ്ഞെടുപ്പ് കമ്മീഷന് . കേന്ദ്ര പഞ്ചായത്ത് രാജ് മന്ത്രാലയത്തിലെ അഡീഷണല് സെക്രട്ടറി സുശീല് കുമാര് ലോഹാനി, ധനകാര്യ മന്ത്രാലയത്തിലെ അഡീഷണല് സെക്രട്ടറി ഡി ആനന്ദന് എന്നിവരെയാണ് തെരഞ്ഞെടുപ്പ് കമ്മീഷന് നിയമിച്ചത്. കേന്ദ്ര ഗ്രാമവികസന മന്ത്രാലയത്തിലെ ജോയിന്റ് സെക്രട്ടറി നിതിന് കുമാര് ശിവ്ദാസ് ഖഡെയെ റിസര്വ് ലിസ്റ്റിലും ഉള്പ്പെടുത്തിയിട്ടുണ്ട്.
എന്ഡിഎ പ്രതിപക്ഷവും തങ്ങളുടെ സ്ഥാനാര്ത്ഥികളെ ഉപരാഷ്ട്രപതി തിരഞ്ഞെടുപ്പില് പ്രഖ്യാപിച്ചതോടെയാണ് തെരഞ്ഞെടുപ്പിന് കളമൊരുങ്ങിയത്. മഹാരാഷ്ട്ര ഗവര്ണര് സി പി രാധാകൃഷ്ണനാണ് എന്ഡിഎ സ്ഥാനാര്ത്ഥി. ബിജെപി നേതാവായ സി.പി. രാധാകൃഷ്ണന് തമിഴ്നാട് സ്വദേശിയാണ്. രണ്ട് തവണ ലോക്സഭാ എംപിയായിട്ടുണ്ട്. നിലവില് മഹാരാഷ്ട്ര ഗവര്ണറായി സേവനമനുഷ്ഠിക്കുന്നു. റിട്ട. ജസ്റ്റിസ് ബി സുദര്ശന് റെഡ്ഡിയാണ് പ്രതിപക്ഷ സ്ഥാനാര്ത്ഥി. മുന് സുപ്രീം കോടതി ജഡ്ജിയാണ് ബി. സുദര്ശന് റെഡ്ഡി. ഹൈദരാബാദില് ജനിച്ച ഇദ്ദേഹം ആന്ധ്രാപ്രദേശ് ഹൈക്കോടതിയിലും സേവനമനുഷ്ഠിച്ചിട്ടുണ്ട്.
ഇന്നാണ് നാമനിര്ദ്ദേശ പത്രിക സമര്പ്പിക്കാനുള്ള അവസാന തീയതി. ഓഗസ്റ്റ് 25 വരെ സ്ഥാനാര്ത്ഥികള്ക്ക് പത്രിക പിന്വലിക്കാം. സെപ്റ്റംബര് 9 നാണ് ഉപരാഷ്ട്രപതിയെ തിരഞ്ഞെടുക്കുന്നതിനുള്ള വോട്ടെടുപ്പ് നടക്കുക.
