അഹല്യാനഗർ: ഓടിക്കൊണ്ടിരുന്ന തീവണ്ടിയിൽ പ്രസവവേദന കൊണ്ട് പുളഞ്ഞ യുവതിക്ക് റെയിൽവേ സംരക്ഷണ സേനയുടെയും സഹയാത്രികരുടെയും സമയോചിതമായ ഇടപെടലിലൂടെ തുണയായി. പൂനെ-സുപോൾ എക്സ്പ്രസിൽ ശനിയാഴ്ച വൈകുന്നേരമാണ് സിനിമാക്കഥകളെ വെല്ലുന്ന രീതിയിലുള്ള ഈ അപൂർവ സംഭവം അരങ്ങേറിയത്. പൂനെയിൽ നിന്ന് ബിഹാറിലെ സുപോൾ ജില്ലയിലേക്ക് യാത്ര ചെയ്യുകയായിരുന്നു ഉത്തർപ്രദേശ് സ്വദേശിനിയായ 28-കാരി റുഖ്സാന ഖാത്തൂനും ഭർത്താവ് ജമീൽ ബേലവാറും. പണ്ഡിറ്റ് ദീൻദയാൽ ഉപാധ്യായ ജംഗ്ഷനിൽ ഇറങ്ങേണ്ടിയിരുന്ന റുഖ്സാനയ്ക്ക് ട്രെയിൻ അഹല്യാനഗർ സ്റ്റേഷന് സമീപമെത്തിയപ്പോഴാണ് അപ്രതീക്ഷിതമായി പ്രസവവേദന അനുഭവപ്പെട്ടത്. തിരക്കേറിയ ജനറൽ കോച്ചിലായിരുന്നു ദമ്പതികൾ യാത്ര ചെയ്തിരുന്നത് എന്നതിനാൽ പെട്ടെന്ന് വൈദ്യസഹായം ലഭ്യമാക്കുക എന്നത് അതീവ ദുഷ്കരമായ ദൗത്യമായിരുന്നു.
വിവരമറിഞ്ഞ സെൻട്രൽ റെയിൽവേ ഉടൻ തന്നെ തങ്ങളുടെ ‘ഓപ്പറേഷൻ മാതൃശക്തി’ വിഭാഗത്തെ പ്രവർത്തനസജ്ജമാക്കുകയും ആർപിഎഫ് കോൺസ്റ്റബിൾ സോമനാഥ് പഥാഡെ, ഹെഡ് കോൺസ്റ്റബിൾ വിശ്വജിത് കക്ഡെ എന്നിവരെ സഹായത്തിനായി അയക്കുകയും ചെയ്തു. യുവതിയെ കോച്ചിൽ നിന്ന് മാറ്റാനോ ആശുപത്രിയിലെത്തിക്കാനോ കഴിയാത്ത വിധം വേദന കഠിനമായ സാഹചര്യമായിരുന്നു അപ്പോൾ. ഈ പ്രതിസന്ധി ഘട്ടത്തിൽ റെയിൽവേ ഉദ്യോഗസ്ഥരോടൊപ്പം ട്രെയിനിലുണ്ടായിരുന്ന മറ്റ് വനിതാ യാത്രക്കാരും രക്ഷകരായി അവതരിച്ചു. യാത്രക്കാർ എല്ലാവരും ചേർന്ന് കോച്ചിനുള്ളിൽ തുണികൾ ഉപയോഗിച്ച് മറച്ചുണ്ടാക്കി ഒരു സുരക്ഷിത ഇടമൊരുക്കുകയും മറ്റ് സൗകര്യങ്ങൾ ചെയ്തുകൊടുക്കുകയും ചെയ്തു. എല്ലാവരുടെയും പ്രാർത്ഥനകൾക്കും പരിശ്രമങ്ങൾക്കും ഒടുവിൽ റുഖ്സാന കോച്ചിനുള്ളിൽ വെച്ച് തന്നെ കുഞ്ഞിന് ജന്മം നൽകി.
ട്രെയിൻ അഹല്യാനഗർ സ്റ്റേഷനിലെത്തുന്നതിന് മുമ്പ് തന്നെ റെയിൽവേ അധികൃതർ സ്റ്റേഷൻ മാസ്റ്റർക്കും 108 ആംബുലൻസിനും കൃത്യമായ വിവരങ്ങൾ കൈമാറിയിരുന്നു. ട്രെയിൻ പ്ലാറ്റ്ഫോമിൽ എത്തിയ ഉടൻ തന്നെ തയ്യാറായി നിന്ന ഡോക്ടർമാരും ആംബുലൻസ് ജീവനക്കാരും ചേർന്ന് അമ്മയെയും നവജാതശിശുവിനെയും ഏറ്റുവാങ്ങി പ്രാഥമിക ശുശ്രൂഷകൾ നൽകി. തുടർന്ന് ഇരുവരെയും വിദഗ്ധ ചികിത്സയ്ക്കായി സിവിൽ ആശുപത്രിയിലേക്ക് മാറ്റി. അമ്മയും കുഞ്ഞും പൂർണ്ണ ആരോഗ്യവാന്മാരാണെന്ന് ഡോക്ടർമാർ സ്ഥിരീകരിച്ചതോടെ റെയിൽവേ ഉദ്യോഗസ്ഥർക്കും സഹയാത്രികർക്കും ആശ്വാസമായി. കൃത്യസമയത്ത് ഇടപെട്ട ആർപിഎഫ് ഉദ്യോഗസ്ഥരെയും മനസ്സാന്നിധ്യം കൈവിടാതെ സഹായിച്ച വനിതാ യാത്രക്കാരെയും റെയിൽവേ അധികൃതർ അഭിനന്ദിച്ചു. ഭർത്താവ് ജമീൽ ബേലവാർ റെയിൽവേ ഉദ്യോഗസ്ഥർക്കും സഹയാത്രികർക്കും തന്റെ ഹൃദയംഗമമായ നന്ദി അറിയിച്ചു.
